Echa a andar Reciella, coleutivu que tien como oxetivu promocionar l’asturianu n’edaes tempranes

‘Reciella. Families pol asturianu’ ye’l nome del coleutivu que ta acabante de dase a conocer de manera oficial a la opinión pública. Esta asociación tien como oxetivu promocionar l’asturianu ente neños y neñes de 0 a 6 años.

Pese a que los sos miembros lleven aconceyando y entamando actividaes a lo llargo d’esti añu, foi’l 19 de setiembre cuando Reciella asentóse como una asociación que “naz ensin ánimu d’arriquecimientu” pa trabayar pola “tresmisión interxeneracional del asturianu nel ámbitu social y familiar y la enseñanza, promoción y difusión de la llingua asturiana nes primeres edaes”. Dende’l coleutivu son conscientes de la importancia que tien esta etapa na tresmisión y deprendimientu d’idiomes, y ven la necesidá de trabayar nesti sen dao’l vacíu llegal esistente n’Educación Infantil sobre la presencia del asturianu nel currículum.

P’algamar los oxetivos colos que naz, Reciella plantega delles aiciones, como l’entamu d’actividaes nes que la llingua vehicular sía l’asturiana, la realización y edición de materiales empobinaos a neños y neñes d’edaes tempranes y la collaboración y la robla de convenios coles alministraciones, instituciones y otros colectivos. Nesi sen, a lo llargo del branu yá punxeron en marcha delles actividaes, como cuentacuentos o talleres d’instrumentos y cocina, qu’animaron a les families que conformen l’asociación a dar el pasu de constituyise como tal.