Avilés entama trés talleres pa deprender a rapiar n’asturianu
El grupu de hip-hop K-Nalón va impartir trés talleres en biblioteques d’Avilés pa neñes y neños con edaes comprendíes ente los 6 y los 15 años baxo’l nome de ‘Rimando n’asturianu’. El primer d’ellos, esti vienres en La Xungarosa, va tar destináu a los más mozos.
La Estaya de la Llingua d’Avilés entama esta actividá en collaboración cola Asociación Cultural Mecigayusca, colos miembros de K-Nalón Tori, Delfo Valdés y Dani Stylo como monitores. L’oxetivu ye averar l’asturianu a la reciella al traviés del hip-hop, al empar que deprende a rapiar.
El primer de los trés talleres previstos va tar destináu a neñes y neños con edaes comprendíes ente los 6 y 10 años, esti vienres na Biblioteca de La Xungarosa de 17.30 a 19 hores. Los siguientes, yá pa los más mayorinos, de 10 a 15 años, van entamase en La Carriona (2 de marzu) y Los Canapés (6 d’abril).
Hai 15 places pa cada taller, polo que ye necesario acutar plaza en caúna de les biblioteques onde va celebrase ‘Rimando n’asturianu’. La inscripción ye de baldre.