Aviespes, abeyes y abeyones

Estos insectos voladores formen parte de la fauna asturiana. Les trés son diferentes, pero al empar tán mui venceyaes, yá que tanto abeyes y abeyones evolucionaron a partir de les aviespes –al igual que les formigues–, y ayuden a la polinización.

La aviespa ye un inseutu himenópteru, como les sos hermanes, de picadura gafa y col cuerpu mariellu y bandes negres. La mayor parte son solitaries, pero hai munches variedaes que viven n’ensame, como faen les abeyes, anque nel casu d’éstes últimes, qu’ellaboren cera y miel, los caxellos son d’un tamañu muncho mayor.


Abeya
¿Sabíes qué…? Hai abeyes en tolos hábitats y continentes del mundu, a esceición de l’Antártida, y son claves pa la polinización de les flores.

La variedá d’aviespa esistente n’Asturies ye la Vespula vulgaris, común a gran parte Europa y parte d’Asia, anque hai otres variedaes autóctones nel país. Miden ente 12 y 17 milímetros, superando la reina los 20 milímetros, y aseméyase muncho a la Vespula germanica, d’orixe mediterraneu, tamiém presente n’Asturies.

Toes elles conviven agora cola Vespa velutina, tamién conocida como aviespa asiática, una especie invasora que ta trayendo munchos problemes. De gran tamañu –unos 25 milímetros, algamando la reina los 32–, ye responsable d’ataques a humanos y aliméntase, ente otros, d’abeyes autóctones, insectu principal que permite la polinización de les flores.


L'aviespa asiática ye una especie invasora.
¿Sabíes qué…? Una especie invasora ye aquella que se desendolca fuera del so hábitat natural, desiquilibrando l’ecosistema nel que s’asienta.

L’Apis mellifica ye l’abeya autóctona d’Asturies. Los ataques que ta viviendo de l’aviespa asiática y el cambiu climáticu ta provocando un descensu de la población, afeutando tamién la producción de miel, mou de vida de munchos asturianos dedicaos a l’apicultura.

Tamién ayuden a la polinización los abeyones, inseutos asemeyaos a les abeyes, anque de tamaño mayor, que se carauteriza por runfar muncho. Al igual que les aviespes, nun pierden l’aguiyón al picar, fechu que sí provoca la muerte de les abeyes.

  • ¿Qué ye un caxellu?
  • ¿En qué se diferencia la reina col restu d’individuos?
  • Cita otres especies invasores que conozas amás de l’aviespa asiática.
  • ¿Por qué muerren les abeyes al picar?

 

Enllaza estos inseutos cola so carauterística más destacada:

Formiga
 
Abeya
 
Caparina
 
Aviespa
 
Mosquitu
 
Abeyón
 
viven en suelu
fai miel
evoluciona dende una belesa
pueden ser solitaries
aliméntase de sangre d’otros animales

nun pierde l’aguiyón al picar