AsturtOOns espubliza trés novedaes con ilustraciones d’Enrique Carballeira
La editorial AsturtOOns ta acabante d’espublizar trés llibros nuevos, toos ellos ilustraos por Enrique Carballeira. Éstos son ‘Flores nel Cantil’ y ‘Avelín, el pingüín’, del propiu Carballeira, y ‘La bañera’, de Cristina Muñiz Martín.
El primer d’ellos trátase d’una historia de maxa y seres mitolóxicos cuntada por Astor, un bruxu pervieyu que conoz lleendes mui antigüeis. Nesta ocasión, va falar d’un cuentu d’una xana y un cuélebre qu’esplica por qué los cantiles enllénense de flores que los faen tán guapos. Pela so parte, ‘Avelín, el pingüín’ ye frutu del taller de cuentos fechu por Carballeira con neños y neñes de Piloña: Avelín vive nel Polu Norte, pero sueña con viaxar. Un día anímase a facelo, atopando mundos y collacios nuevos.
Completen esti tríu de novedaes ‘La bañera’, una historia enllena d’humor y situaciones fantástiques –inclusive sorrealistes– firmada por Cristina Muñiz sobre cómo los neños del futuru faen pa llavase. ¿Tendrán sistemes especiales mui diferentes a los qu’emplegamos nel 2012?