Asturies celebra esti miércoles Samhain, l’añu nuevu celta

Munchos colexos del país festexen esti miércoles ‘Halloween’, la versión estauxunidense de Samhain, l’añu nuevu celta. N’Asturies esta festividá tien una tradición importante más allá del peliculizáu ‘truco o trato’.

La Viéspora de Tolos Santos, como se conoz anguaño n’Asturies, tien orixe nel propiu Samhain, fecha na que se consideraba qu’acababa’l branu y llegaba l’iviernu; na que la escuridá ganaba a la lluz. Tamién yera’l día nel que los celtes creíen que los espirítus caminaben ente los vivos y volvíen a les sos cases. D’ehí la gran cantidá de tradiciones que perduraron nel tiempu como la colocación de comida y agua na puerta de les viviendes p’alimentar a los seres queríos muertos y evitar a los espíritus malos. Tamién n’Asturies yera la nueche na que los sos habitantes temíen la presencia de La Güestia.

Esta festividá, al igual que munches otres, foi cristianizada y convertida no que güei ye’l Día de Tolos Santos. Pese a ello, Asturies mantuvo munches tradiciones venceyaes a esta fecha, agora contaminaes por Halloween, los sos disfraces y les sos histories de terror que nada tienen que ver cola tradición del país. Asina, hasta bien poco yera habitual ver nos pueblos d’Asturies calabaces y nabos agüecaos, dalgo que tovía se mantién en dalgunos llugares. Los neños y neñes tamién visitaben les cases pidiendo dulces, dalgunos cola cara pintada de ceniza. Unes tradiciones perguapes que paga la pena mantener.