Alicia Álvarez presenta los temes n'asturianu de 'Pulgarina' en direuto

Celébrase la segunda sesión del festival 'Escenines pa la Reciella', qu'estrena'l Centru de Cultura Antiguu Institutu como sede.

Tres l'ésitu de la presentación de 'Bestiariu 2' del llunes, con un salón d'actos del Colexu Públicu Xovellanos que quedó pequeñu, agora llega'l turnu d'otra producción de La Fabriquina editada por Araz –empresa editora tamién d'A la Gueta los Suaños–, la de 'Pulgarina'. La so autora, Alicia Álvarez, va interpretar los siete cantares que conformen esti discu-llibru que cuenta la historia de "una neña tan pequena que nun consiguía ver les coses con perspectiva…", según apunta la cita qu'abre la obra.

En 'Pulgarina' el llector va poder siguir les aventures de la protagonista al traviés de los cantares de la componente de Pauline en la Playa compuestes y interpretaes con guitarres y sintetizadores pola propia música, producíos por Daniel Fletcher y grabaos nos estudios Supersonic. El llibru, mentes, cuenta con ilustraciones d'Alicia Varela.

La cita va ser a les 19 hores d'esta tarde nel Centru de Cultura Antiguu Institutu. Darréu, 'Escenines pa la Reciella' va continuar con trés activididaes teatrales: ‘Retalinos’, d’Olga Cuervo y David Varela, va representase’l llunes a les 12 hores (Antiguu Institutu); ‘Una casa’, d’Higiénico Papel, el día siguiente a les 19 hores (CP Xovellanos); y ‘Runa’, de Nun Tris, el miércoles a les 19 hores (CP Xovellanos).