Abiertu’l plazu d’inscripción pal tercer ‘Sácame pola pinta’

Abiertu’l plazu d’inscripción pal tercer ‘Sácame pola pinta’

Hasta’l vienres 21 d’avientu ta abiertu’l plazu pa unviar los videos pa pasar la seleición y participar nel III ‘Sácame pola pinta’, que va tener llugar el 4 de xineru a les 20 hores nel Teatru Nuevu de La Felguera. La demanda ta siendo alta, como amuesa que yá se completara'l cupu pa la imitación de Paula Rojo y Luz Casal.

Nel ‘Sácame pola pinta’ de menores, qu'entama'l Grupo A Mansalva, pueden tomar parte toes aquelles neñes y neños menores de 18 años a fecha del 5 de xineru. Pa ello han d’unviar un videu n’horizontal con un llargor non superior a 1 minutu del cantante qu’escueyan –en casu de grupu ha de ser del vocalista–, acompañáu d’un instrumentu en direuto o en playback, al WhatsApp del númberu de teléfonu 667.252.611 xunto colos datos completos propios y del so tutor llegal.

Como novedá, un mesmu aspirante ha d’inscribise pa imitar al menos a dos de los artistes de la llista seleicionada pola organización. En total hai 16 opciones pa escoyer: Luz Casal (‘Vengo del norte’, completa), Cristina del Valle (‘Durmite fíu), Desakato (‘Cada vez’), Vicente Díaz (‘La Pola Siero’), Los Berrones (‘La de Sindo’l cabreru’), Víctor Manuel (‘Paxarinos’), Nuberu (‘Tengo de rondar to valle’), Zapato Veloz (‘Tengo un tractor amarillo’), Corquiéu (‘La xana’), Marisa Valle Roso (‘Planta 14’), Mapi Quintana (‘Arriba limón’), Rodrigo Cuevas (‘Emrujada’), Escuela de Odio (‘Asturies arde’), Silvia Quesada (‘Salvamos’), Delagua (‘Con la vida en los zapatos’) y Paula Rojo (‘Sólo tu’, completa).

El ganador del concursu tendrá como premiu la grabación d’un discu promocional de cuatro cantares del repertoriu del cantante imitáu nel concursu nun estudiu profesional. Va tar acompañáu d’un instrumentu, pianu o guitarra, y van editase cien copies en CD cola so respeutiva caxa y portada diseñada.

AdxuntuTamañu
PDF icon Bases del III 'Sácame pola pinta'451.27 KB