La esitosa serie gallega pa neños ‘Os Bolechas’ emitiráse en TPA en llingua asturiana
‘Os Bolechas’, la serie infantil en gallegu que ye una sensación nel país vecín, podrá vese n’asturianu na TPA. Vacaloria Producciones ta trabayando nel doblaxe del programa al nuesu idioma y la direición del ente públicu de comunicación anunciará en feches próximes la so emisión.
Creada nel 2000 por Pepe Carreiro como una serie pa llibros, con más de 400 títulos espublizaos y 1.500.000 d’exemplares vendíos hasta la fecha, dio’l saltu a la pantalla en febreru del 2012 de la mano de TVG2 con un especial sobre’l ‘entroido’, a lo que siguió la emisión de capítulos dende setiembre, aumentando la popularidá de ‘Os Bolechas’ ente los más pequeños. Asina, el programa protagonizáu por muñecos suma yá cuatro temporaes, xenerando al so alrededor una bayura de productos como un discu, un álbum de cromos, una llinia de xoyes o un espectáculu que xira per toda Galicia. En feches próximes, el fenómenu Bolechas dará’l saltu a Asturies gracies al doblaxe de los capítulos de la serie al asturianu pa la so emisión pela TPA. Vacaloria Producciones, empresa responsable de Superasturian@s, trabaya anguaño nel so doblaxe y la direición de la canal pública anunciará próximamente los detalles del proyeutu.
D’esta forma, TPA va recuperar les emisiones de programes infantiles depués de dellos años d’ausencia na so parrilla televisiva. El fechu de que s’emita n’asturianu cumple una vieya demanda del movimientu de defensa de la llingua, qu’entiende básico pa la tresmisión xeneracional del idioma la esistencia na canal pública d’esti tipu de productos destinaos a los más pequeños.
Les aventures de seis hermanos
La serie gallega ta protagonizada por seis hermanos y el so perru ‘Chispa’, y cuenta les sos aventures, na que tamién participen de manera espóradica los sos padres, güelos o collacios. ‘Os Bolechas’ destaca polos sos conteníos didáuticos y pedagóxicos, posibilitando l’afitamientu del idioma ente los espectadores d’una manera divertida y xugando asina un papel importante na promoción de la llingua propia.