L'insoportable abandonu de les biblioteques públiques

Al riscar de los ayuntamientos democráticos –nos primeros ochenta del sieglu pasáu– el vecinderu apuraba a los conceyales electos con una montonera de demandes pa poner igua a tantes carencies como daquella afogaben a los pueblos, villes y ciudades d’Asturies y de toa España. Había qu’entainar a buscar nueves estructures pa dar participación a la xente, había qu’iguar caminos y asfaltar carreteres, allumbrar cais, equipar parques, llevantar ambulatorios… Pero había tamién abondo que meyorar n’educación y cultura. Nes ciudaes aquel fervor participativu llideráronlu de mano les mui influyentes asociaciones vecinales, entós base social de la representación política. La cultura viose darréu como una prioridá, y preba d’ello ye qu’ente les primeres reivindicaciones nunca faltaba la demanda d’una biblioteca pública pal barriu. Polo xeneral, los conceyos fueron atendiendo, na midida de les sos prioridaes y posibilidaes, aquelles demandes comunitaries y les biblioteques xurdieron equí y alló, na conciencia de que yera obligación de cualquier sociedá mínimamente desarrollada ufiertar, xunta servicios básicos como la sanidá, la enseñanza o la seguridá, el serviciu de biblioteca pública.

Resumiendo les directrices IFLA/Unesco, l’oxetivu fundamental de les biblioteques públiques ye ufrir a la ciudadanía (ensin nengún tipu de discriminación por causes sociales, económiques, étniques o culturales) recursos informativos y apurrir servicios d’instrucción, información y ameyoramientu personal, n’actividaes intelectuales, d’entretenimientu y ociu. La so finalidá última ye xugar un papel nel progresu y el mantenimientu d’una sociedá democrática al poner al algame de la ciudadanía la mayor cantidá posible de conocimientos, idees y opiniones. Con eses premises, n’Asturies fueron naciendo equí y acullá unes pequeñes y precaries biblioteques, infradotaes a lo primero, con personal voluntario a menudo, pero enllenes de vitalidá. Fueron el xerme d’un sistema bibliotecariu que más tarde diba a medrar y dotase de meyores instalaciones y de recursos y personal profesional cada vez más preparao. La total incuria de la que se venía nun permitió algamar unos niveles asemeyaos a los países más avanzaos del rodiu européu y había la conciencia de que diba llevar munchu tiempu y esfuerzu equiparase a ellos nos estándares y ratios de llibros por habitante. Pero lo que sí había yera un consensu na importancia de les biblioteques como vertebradores de la vida cultural de base y como correctores de desequillibrios sociales. Porque nenguna institución representaba meyor los valores democráticos que la biblioteca pública.

Yera por eso mui importante que les alministraciones competentes (sobremanera l’autonómica y les llocales) caltuvieren l’esfuerzu inversor na creación y meyora de les instalaciones y na dotación de llibros, audiovisuales, publicaciones periódiques y los nuevos soportes multimedia que fueron xurdiendo nesti mediu tiempo. En bona midida asina se fizo hasta pasáu’l cambiu de sieglu, pero la crisis de la burbuya inmobiliaria en 2008 españó tamién nes cabeces de los responsables políticos, que s’escaecieron de sópitu de la importancia que les biblioteques diben tener precisamente nun tiempu crítico como’l que llegaba. En llugar de fortalecer les biblioteques –cosa que presupuestariamente podía salir bien barato– aplicáron-yos recortes brutales nes partíes pa la compra de llibros. Inxustificable error, sobre manera cuando vieno de responsabales políticos de la izquierda munches veces gobernante.

Xustamente nos tiempos de dificultaes ye cuando más se sorraya‘l papel reequillibrador que na igualdá d’accesu a la cultura cumplen les biblioteques públiques, que tanto ayudaron na democratización de les TICs. Cuando les capes sociales más azotaes pola crisis podíen atopar abellugu pa les sos carencies nes biblioteques –como asina pasó, de toles maneres–, los xestores públicos aplicaron, añu tres añu, tisoriazos a les partíes pa compra de llibros, cuando non les desaniciaron dafechu. Podíemos traer equí cifres deprimentes y llastimoses comparatives d’esti conceyu y del otru –y percima d’ellos les competentes a los gobiernos del Principáu– pero nada diba rescamplar con más elocuencia que la tristura de los estantes vacios de novedaes, los llibros gastaos pol usu y los revisteros abandonaos de les biblioteques públiques.

Contra esi murniu panorama de la desidia, el desdexamientu y l’abandonu que vienen sufriendo estos últimos años la gran mayoría de les biblioteques públiques d’Asturies, pa vergoña de los responsables políticos y xestores culturales que les tienen al so cuidáu, merez destacase l’exemplar trabayu d’unes poques decenes de profesionales bibliotecaries asturianes –dexáime usar equí’l femenín como xenérico–, que caltién nes pequeñes biblioteques de barriu, de pueblu o de villa, la puerta abierta a la casa común de tanta xente, y que les enllena con un fervederu d’actividaes participatives –alcuentros lliterarios, clubes de llectura, cuentacuentos…–, que sobreviven a base d’un entusiasmu a toa preba. Bien merecíen un respetu mayor.