Día del Llibru Asturianu

Faltosu, semántica y política

Pepín Fernández's picture

Dende el mio asturianu patrimonial la pallabra ye faltusu, pero ta ún avezau yá a la forma normalizada, por eso entitulé faltosu. Faltosu y non faltosa, porque les más de les veagaes son homes los faltosos: hai poques muyeres faltoses. Asina que si pa munches coses usamos el masculín como xenéricu, nesti tema con más razón.

Según el diccionariu, faltosu quier dicir delles coses, vamos veles.

Faltosu ye’l que falta a otru, el que ye un faltón, anque pa min nun ye’l que falta con insultos gordos, sinón más bien el qu’afata, esto ye, el que trata de facer fatu al otru; el que pretende que l’otru sía causa de risión. Ye normal dicir que fulanín cuando bebe ye un faltosu, anque yo siempre opiné que’l faltosu ye’l paisanu y non la bébora; que’l que ye bona xente nun se vuelve faltosu col vinu.

Faltosu ye tamién el que-y falta dalgo, esto ye, el que ye un pocu fatu, nun tien toles lluces o falta-y ‘una patatina pal quilo’. Hai que facer notar que’l qu’afata a los demás –ye dicir, ye faltosu– suel además falta-y dalgo a él, polo que tamién se-y pue llamar faltosu por eso. Por afatar y por falta-y hores de sol.

Pero faltosu tamién s’usaba, al menos nel mio pueblu, pal que faltaba a les sestaferies. Al venir el domingu, tola xente del pueblu diba misa. Y al salir, xubíase’l pedaniu a la panda’l cavidru y lleía los nomes de los vecinos (vecinos yeren cases y nomábase sólo al paisanu) que yeren ‘faltosos’, esto ye, que teniendo que dir a una sestaferia tiraren pal chigre o a rozar al so prau.

Dicen que el mio bisagüelu cuando foi pedaniu, fartucu de lleer toles selmanes el nome d’un vecín que faltaba siempre a les sestaferies, al llegar a él, en vez de dicir faltusu, dixo “fulanu, esti tuntu perdíu”. Traigo esto equí pa dicir que tenía razón el mio bisagüelu. Si nun trabayes pal común ye que yes tuntu perdíu.

Agora tal paez que ye al contrariu: el más llistu ye’l que mira pa lo de so y desprecia lo común. Pero enantes los faltosos o espabilaben o morríen de fame, porque yera una economía de subsistencia. Y pa sobrevivir lo común yera fundamental. Nun había mandu a distancia y l’Estau sólo venía pa llevar les perres de la contribución y les herencies. Por eso había que ser faltusu –ye dicir, tuntu– pa ser faltusu –ye dicir, nun dir a les sestaferies–.

No fondero, les trés coses que quier dicir faltosu son una cosa. Si te falta un veranu, faltes a los demás, precisamente porque te sientes menos que los demás y quies rite d’ellos pa disimular. Y amás desprecies lo común porque te crees mui llistu y pienses que tu solu pues facelo too.

El gran problema ye que tamos faciendo una sociedá de faltosos. Los mozos y moces tán mirando a los ‘youtubers’ tol día y la mayoría nun son más que faltosos con perres. Pero tener perres nun cura lo tonto; eso curase lleendo y trabayando. Y estos ‘youtubers’ pasen el día faciendo’l zánganu y charrando.

Si queremos facer una Asturies y una Europa que sían afayadices pa vivir nos próximos años, tenemos que sacar de la plaza pública a los faltosos y enllenala de xente trabayaor y respetuoso, que piense enantes de falar. Enseñar a los rapacinos y rapacines qu’esos faltosos nun valen nada y ofrecer modelos positivos. Pero eso hai que facelo tamién nos medios de comunicación y na política. ¿Facemos-y un esame de faltosidá a Trump? ¿Y a Herrera, Reverte o Aznar?

El mio bisagüelu cuando afataba al faltosu sabía que contaba cola cultura de la xente pa entender qu’esa persona merecía’l reproche social, qu’había qu’aislar al que sólo pensaba en sí mesmo. Tenemos que recuperar esi sentíu social; esa idea del conceyu que manda sobre la xente.

Si damos ales a los faltosos y rimos-yos les gracies, habrá cada día más, y con faltosos na sociedá nun queda más que fame y guerra.

Pepín Fernández ye inxenieru téunicu y trabaya nuna empresa de telecomunicaciones. Ye del Altu Nalón y vive en Xixón. Ye afiliáu d’EQUO Asturies y foi miembru de la Mesa de Coordinación y responsable de Comunicación. Tamién trabaya nel blogue 'Verdes y libertarias'.

Contador Estadistiques