El paisanu, el fueu y el llobu (II)
1 Marzu, 2016 por Pepín Fernández
- Pepín Fernández's blog
- Inicie sesión o rexístrese pa espublizar comentarios
El fueu n'Asturies nun naz solu. Cuando'l monte quema ye porque daquién prendió-y fueu. Y la xente que prende fueu, préndelo pa quemar el monte. Fáenlo de nueche, en munchos sitios al mesmu tiempu. Y fáenlo sabiendo cómo quemar más superficie. Nun se trata de xente que tea lloco, que nun sabe lo que fai. Pue ser el casu en dlnguna de les quemes, pero son les menos.
Les persones que prenden fueu son xente de los pueblos que quemen col sofitu de munchos de los sos vecinos. La quema ye un aspeutu más de la rellación col monte que ta nes páxines de los periódicos casi tos los díis. Nun voi dicir lo que me paez lo que pasó, voi discutir les razones que sentimos pa defender el fueu.
Cuando se fala d'esti tema siempre dicen que tu nun sabes, qu'eso siempre se fixo, asina que vamos ver qué ye lo que se fixo 'siempre'.
Una cosa que se fixo siempre foi segar felechu. Mientres les cuadres nun tuvieren cames de cementu pal ganáu, usábase'l felechu pa estrar, esto ye, pa facer la cama de los animales. El felechu tamién s'usaba pa les cameres de los vaqueros, que dormíen nes caseríes pa llindiar el ganáu. Por eso, el felechu, que ye una planta que nun come nengún animal, yera mui apeciáu y nun se podía segar namás que nel tiempu marcáu pa ello, pa nun lu corar y que l'añu venideru se pudiere volver segar. Por eso'l felechu nun crecía: porque se segaba tolos años.
Les caseríes del monte teníen toes amu y l'amu rozábales y llimpiabales tolos años; mientres vivía na casería pa gastar l'herba que segara y curaba pol veranu na casería. Cuando se segaba pel veranu, fuera nel monte o nun prau nel pueblu, desorellábase; eso quier dicir que se segaba con cuidáu al pie de les sebes pa que nun quedasen matos nin artos que fueren comiendo'l prau.
Nos montes de castañu, granxábense les castañares, porque teníen amu los árboles aunque nun los tuviere'l terrén. Y si yeren del común, puyábase'l frutu tolos años. Ello yera que nun quedaba un palmu terrén ensin andar y ensin pisar. Eso frenaba tamién los matos.
Les escobes, ucies, árgomes según el sitiu, usabánse tamién pa quemar nes cabanes y, por tanto, tamién se cortaben.
Quiero dicir con too esto, que’l trabayu de los vaqueros facía que les mayaes y los praos siguieren de pascu y nun los comieren los matos, que ye'l camín natural del campu n'Asturies si nun apaez la mano del home.
Otra cosa que yera muy importante ye que'l ganau allindiábase. Les cabres sobre manera solíen tar siempre con un pastor o pastora, normalmente un guaḥe.
Coles vaques podía haber oveyes o pollinos, y amás tamién s'allindiaben munches vegaes. Esto ye importante porque un animal que ta al so aire y ensin que lu allindien, come lo que-y paez y lo que más-y gusta. Siempre sentí dicir que 'ta decimando', apañando namás que lo que-y gusta y estropiando lo demás. Si amás tengo sólo vaques, ensin pollinos nin oveyes nin cabres, van crecer plantes que les vaques nun comen y los otros animales sí, y a la vuelta d’unos años, la mayada va dir zarrando y teniendo cada añu menos pascu. Por tantu, lo que se facía enaantes nun yera prender fueu; lo que se facía yera un usu milenariu del monte que se caltenía solu, ensin falta del fueu, pero que yera posible porque había muncha mano de obra disponible.
¿Prendíase’l monte va 50 años? Sí, ye verdá prendíase, pero hai que tener en cuenta delles coses. En munchos sitios hai carves y cuestes que yá nun tienen casique aprovechamientu porque lleven munchos años quemándoles y foren viesques de bona tierra y agora son carbes ensin árboles. Eso fíxose, pero nun debemos siguir faciéndolo. Yá nun tamos nel neolíticu. Sabemos qu'hai un cambiu climáticu. Sabemos qu'hai mui puco terrén que nun tea machacáu pol ser humanu y tenemos que mantener les zones que tovía nun destruyimos; y col fueu nun se mantién, destrúyese. El cambiu climáticu tamién fai que'l fueu sía munchu peor pa la tierra, porque al tar más seco, quema mientres varios díis y acaba con tolo qu'hai. Vivimos nel sieglu XXI y nun podemos mantener usos de va mil años como si nun hubiese cambiara nada.
Otra cosa de la que se fala poco son les subvenciones. Parte d'ese quemes fáense pa mantener pastos que, en realidá, nun se usen, pero cuenten a la hora de cobrar les subvenciones
Por tanto y resumiendo, vivimos tiempos nuevos y tenemos qu'entendelos. Si la xente yá nun siega felechu pa estrar, nun veo por qué tien que quemar y dicir que eso ya lo facíen los sos antepasaos. Nun podemos quemar sólo pa tener subvenciones. Tenemos que ver cómo facemos pa caltener el pascu ensin quemar. Y pa eso, una cosa fundamental ye trabayar dende un bancu de tierres que permita qu'una persona que quiera entamar con una ganadería, tenga acesu a la tierra con facilidá y nun necesite quemar el monte pa poder sobrevivir.
El fueu ye'l nuestru enemigu. Mata, destrúi, contamina... Tien qu'acabase. Y hai que dicilo bien nidio. Y hai que dici-ylo a les persones que viven del ganáu. El so ganáu nun val tantu como lo que valen los daños que fai'l fueu.
Llea calcando equí la primer parte del artículu d'opinión.
Pepín Fernández ye inxenieru téunicu y trabaya nuna empresa de telecomunicaciones. Ye del Altu Nalón y vive en Xixón. Ye afiliáu d’EQUO Asturies y foi miembru de la Mesa de Coordinación y responsable de Comunicación hasta’l pasáu 12 de payares.
Efrén d'Andrés
Lo + visto de la selmana
Comentarios
Tardé en contesta-y a la primer parte porque amenazaba una segunda. Agora puedo dici-y que lo que ye mentira ye que diga que les polítiques (y los ecoloxistes como ñuevu movimientu políticu) nun tienen ñada que ver colo que pasa na nuestra sociedá. Si n’Alemaña hai menos paru qu’equí, ye por unes polítiques económiques y sociales y por unes característiques históriques qu’equí nun hai. Y si diz que la merma de población rural ye lo mesmu n’Alemaña que n’España ye porque se tan aplicando les mesmes polítiques nos dos sitios: la americanización de la agroganadería.
Illas pierde población ensin haber llobos, ooooooooooooh, que bon argumentu pa la ganadería de montaña y estensiva, a non, espera, que n’Illas tampocu hai d’eso, que'l 80% son vaques de valles y pintes, qué hai 8 cabres en tou el conceyu!!!. Nun nos vacile, que conocemos la nuestra tierra.
Les figures de proteición los habitantes de los pueblos nun les quieren porque a nadie y presta que na so casa manden los de fuera. Y son una vergüenza. Ye una vergüenza que pa poner una visera antialudes en Sotres tenga que reunise esi ente llamáu Patronatu de esa “Figura de proteición” n’un hotel de cuatro estrelles pa decidir si los vecinos pueden tener más seguridá na so carretera, por exemplu, eso ye lo que nun nos presta.
Nun tarda más que cinco párrafos en sacar el tema les subvenciones. Prestami que lu saque ún que se quier facer d’izquierdes. Cuando n’Asturies la renta de los ganaderos según un estudiu de la Universidá d’Uviéu diz que ta nuna media de 18000€, ye dicir, malapenes mileurista, vien ún, d’izquierdes pa más sorna, y echa-y en cara que pida una subvención que y pertenez por derechu. Rezumba’l panderu Manín. ¿Por qué el númberu de vaques ye mayor por ganadería agora? Dilo, pero nun lo respón. Al contrariu, paez que lo echa en cara.
El mayor esperpentu de tou l’artículu ye el párrafu del Facebook, lo primeru porque otra vez, ún que se diz d’izquierdes ñega el derechu a manifestase y lluchar pol so pueblu, pola so forma de vida y pola so dignidá. Si usté ye d’izquierdes yo tengo que ser d’otru mundiu. Y lo segundu, ¿va dicimi usté que’l mio mundiu nun existe? Nun esiste el mundiu rural de los años 50, pero que ye que ¿nel ámbitu urbanu esi mundiu si esiste el mundiu de va 50 años? Bonu, ye’l mesmu argumentu que los siguidores de Merceditas Fernández, l’asturianu ya nun esiste, nun lo fala naide. Paez que los aprendices tienlos en toos los llaos.
Hai que construir un futuru nos pueblos, sí, pero hai que entender que pa eso hai que contar cola xente, que el colonianismu yá s’acabó y que nun puede vinir a dar lleiciones de ganadería un que diz que les vaques nun se mullen güei. Humildá y oyir aquellos que tan onde pretén mandar. Porque eso ye lo más gordu, que vien a dar lleiciones el que nun trabaya n’eso, porque ye el deporte la ñación, criticar que si siega asina o asona pero nun facelo usté. Que esa ye otra, ún que se diz d’izquierdes y que pela mañana dirá a una manifestación pal luchar por un trabayu dignu, pela tardi escribe equí pa dicir esos mangantes que nun trabayen (que nun sieguen, que nun allenden, que nun que nun).
Sigue falando del fuéu, esi tema que ta tan de moda. Lo primeru: una cosa ye el fueu que usté fala, el de los incendios y otra ye el fue de les quemes de pastos. Nun podemos mantener usos de va mil años diz. Ya que s’alcuerda de la so güela, vo alcordame yo de la mía y ella dícia: como lo antiguu nun hai ñada. Reflesionelo.
Yo que taba pensando que’l cambiu climáticu tenía dos problemas bien gordos: EEXX y China y non, el problema taba n’Asturies, pero non nel triangulu Avilés-Xixón-Mieres non, taba nos pueblos asturianos. Nun pueo cuantificar el dañu mediuambiental de quemar una cotoya, pero lo mesmu ye menos que abrir una mina de coltan en El Congu pa que usté tenga un ordenador pa escribir lo que escribió.
Nun se fala de les subvenciones diz. Pa falar lo que ustá fala meyor que non. Contar la historia al revés pa llevala al so terrén. Diz que se cobra subvención por un terrén que nun se usa. Yá quedó claru que usté de ganáu pocu, pero de papeléu del ganáu menos. Si n’Asturies na más que hubiera un paisanu con una vaca y la superficie de pastu fuera la mesma que tradicionalmente hubo, esi paisanu nun diba a cobrar les subvenciones de toa Asturies diba a cobrar a tenor de la so vaca. Asina que nun diga que se quema un terrén pa tener subvenciones porque ye al revés, los pastos desapaecen xestionaos dende los despachos y dempués dicen “ahhhh nun hai sitiu pa lo so vaca”. El so pueblo, la so tierra, pero la so vaca nun puede tar ehí.
El fueu nun ye’l nuestru enemigu. Un incendiu sí. Lo mesmu que el agua ye la nuestra vida y una riadona ye la destrucción.
Y había tantu, tantu que contesta-y de más, que nun puedo siguir porque esto nun ye’l mediu, pero tenga por seguru que nun vamos a dexar de lluchar nin de glayar en Facebook, nos periódicos, en manifestaciones o onde seya. Habrá que pone-y un nome prestosu “Marea de daqué color”, lo mesmu asina alcontramos sofitu.
Personalmente dici-y que se faiga mirar lo de ser d’izquierdes porque tenía entendíu que un d’izquierdes yera aquel que lluchaba pola xente necesitao, pola xente que tien les manes agrietaes y el llombu destrazáu de trabayar toos los diés del añu y tan esplotaos por un sistema que nun los dexa medrar. Un sistema como el que fai que desapaezca la ganadería estensiva, la que va y vien a los montes asturianos con toa clas de ganáu y de frutos pa tornase intensiva, a lo americanu, con un abusu de recursos naturales y de control total de los recursos alimenticios. La cama nun tien que facenosla a los “pueblerinos” que lluchamos polo que usté diz que ta perdíu, si de verdá ye d’izquierdes, lo que tien que facer ye nun metese na cama colos del capital.