Zea Mays, banda referente del rock n’eusquera, estrénase n’Asturies con conciertos en Xixón y Uviéu

La banda Zea Mays, referente del rock n’eusquera, visita per primer vegada Asturies. Los bilbotarras van ufrir un conciertu en Xixón esti vienres xunto con Bueno, pa mañana facer lo propio n’Uviéu con La Tarrancha.

Creada en Bilbo nel añu 1997, esta formación cuenta con una maqueta y siete discos grabaos, l’últimu d’ellos ‘Da’, con trece composiciones direutes y poderoses nel que destaca la voz de la vocalista, Airoa Renteria. L’ésitu algamáu n’Euskal Herria y esta trayeutoria amplia permitió a Zea Mays actuar en países de toda Europa y en Xapón, amosando una vegada más que la llingua nun supón pilancu nengún pa llevar la bona música fuera del territoriu propiu.

El proyeutu ‘Ixuxú. Asturies-Euskal Herria Elkartea’ permite a los asturianos disfrutar per primer vegada del soníu de los bizkaitarras en dos conciertos que van preceder a la presentación del discu en direuto n’Euskal Herria. El primeru va tener llugar esta nueche, a partir de les 22 hores, na sala xixonesa The Class (entrada, 5 euros), onde Zea Mays van tar acompañaos de la banda pop-rock asturiana Bueno. Mañana, a les 20 hores, la cita va ser nel Centru Social Okupáu Autoxestionáu La Madreña, n’Uviéu, xunto col grupu de mecigayu-ska La Tarrancha (entrada, la voluntá). Enantes, a les 18 hores, va proyeutase’l documental ‘Emarock’, n’eusquera con subtítulos nel nuesu idioma gracies al llabor d’Iniciativa pol Asturianu, qu’analiza al traviés d’entevistes el porqué de la poca presencia de la muyer nel rock vascu.

Esta cinta, amás, complementa a la esposición fotográfica de mesmo nome que se pue visitar dende’l llunes pasáu –abierta hasta’l domingu– en La Madreña y que tien como oxetivu sofitar, visibilizar y normalizar la música fecha por muyeres. Esta selmana d’actividaes entamaes por Ixuxú n’Asturies completóse cola proyeición, el miércoles en Xixón, de la película-documental de Fermin Muguruza ‘Zuloak’.