#YoFaloAsturianu: respuesta dende Asturies a Pablo Casado

Pablo Casado, presidente del Partido Popular (PP), declaró esti martes n’Almería que’l PSOE quier imponer “el bable, que nadie habla en Asturias”. Esta afirmación provocó una rápida respuesta nel país, faciendo que la etiqueta #YoFaloAsturianu fora tendencia n’Asturies en Twitter, con repercusión en tol Estáu.

En plena precampaña poles eleiciones andaluces, el líder popular dirixóse a la presidenta Susana Díaz pa pidi-y esplicaciones pol fechu de “que su partido esté imponiendo el eusquera en La Rioja; o esté imponiendo el catalán en Aragón; o esté imponiendo el bable, que nadie habla, en Asturias. Me gustaría obtener esa respuesta”. Foi nun almuerzu informativu del Fórum Europa Tribuna Andalucía entamáu por Nueva Economía Fórum ayeri y nel que tamién participó el candidatu del PP a la Junta, Juan Manuel Moreno.

La respuesta nun se fixo esperar y numberosos asturianes y asturianos emplegaron les sos cuentes na rede social Twitter p’amosar la so indignación emplegando la etiqueta #YoFaloAsturianu y faciendo referencia a Casado pa tresllada-y qu’ellos falen nesa llingua inesistente pal popular. Tal foi’l nivel d’emplegu de dicha etiqueta que #YoFaloAsturiano ye tendencia dende ayeri n’Asturies na rede social y tamién s’asitió güei ente les primeres a nivel estatal.

Mercedes Fernández sí diz falar asturianu

Les declaraciones de Casado choquen col videu difundíu pol so partíu n’Asturies pa refugar la oficialidá nel que la so presidenta, Mercedes Fernández, afirma que “en Asturias hablamos asturiano desde siempre, y lo hacemos con naturalidad”. La desconocencia de la realidá asturiana foi precisamente ún de los aspeutos que más-y echaron en cara al sucesor de Mariano Rajoy los usuarios qu’emplegaron la etiqueta #YoFaloAsturiano.

Lo cierto ye qu’esti episodiu vien a confirmar la regresión del PP no que respeuta a la defensa de los derechos llingüísticos. Convién recordar que los populares impulsaron nel 1998, xunto col Partíu Asturianista (PAS), la Llei d’Usu y Promoción del Bable y Asturianu, y que non mui allá llevaben nel so programa eleutoral la creación de la especialidá docente de Llingua Asturiana y Gallego-asturiano.

14 años trabayando nun proyeutu de conocimientu llibre n'asturianu.

Más de 78 millones de pallabres.

Más de 2 millones d'ediciones.

150.000 páxines con conteníu.

Cuasi 100.000 artículos.

La nuestra enciclopedia fala n'asturianu y va siguir faciéndolo. #YoFaloAsturianu

— Wikipedia n'asturianu (@wikimediast) 13 de noviembre de 2018

Estimáu @pablocasado_ #yofaloasturianu mi empresa fala n'asturianu, la mio xente fala n'asturianu... Nun insulte a los mios drechos nin a los drechos del pueblu asturianu.

— Lluis Nel Estrada (@lluisnel) 13 de noviembre de 2018

Por tola xente que morrió creyendo que "nun sabía falar bien" y por tolos que entá piensen que son "paletos" por falar na so llingua llariega @pablocasado_ #yofaloasturianu

— Daniel Naredo (@dani_nt98) 13 de noviembre de 2018

Diz @pablocasado_ que n’Asturies nun falamos asturianu. Esta frase ye d’un llibro de Manolo Asur que merque en 1978.

quixera ser l’olvidu pa que t’alcuerdes siempre de mí (Manolo Asur) #yofaloasturianu pic.twitter.com/LcZwqYbaxE

— ana_castaño (@anacast27086737) 14 de noviembre de 2018

@pablocasado_ #yofaloasturianu como los mios güelos y los mios padres ficieron y creo que la única forma pa evitar que la nuesa llingua muerra y con esto una parte perimportante de la cultura asturiana y española ye la #Oficialidá.

— Santos Tejón Llaneza (@LlanezaTejon) 13 de noviembre de 2018