González Riaño convida a Casado a visitar l'ALLA

El presidente de la institución académica unvió una carta al popular depués de les sos declaraciones sobre l'idioma feches n'Almería.

Pablo Casado afirmó que’l PSOE quier imponer “el bable, que nadie habla en Asturias”. "Quedé ablucáu y afaráu al empar: ¿cómo ye posible que'l presidente d'un partíu tan importante pa España como ye'l PP manifieste tal desconocimientu acerca de la realidá cultural asturiana?", entrúgase Xosé Antón González Riaño nel testu pal dirixente castellanu.

Darréu, espon-y una serie d'apuntes de la historia del asturianu y datos actuales sobre l'idioma, como que "l'asturianu ye faláu y entendíu por una parte mayoritaria de la población", pa siguir tresllando-y el so deséu d'afondar sobre toos ellos en persona, polo que lu convida "a visitar l'Academia de la Llingua Asturiana –cuando les sos obligaciones lo permitan– pa conocer les nueses actividaes y demandes. Nun se trata, Sr. presidente, d'una invitación retórica, sinón d'una propuesta sincera y abierta que busca que'l PP entienda la nuesa realidá llingüística y cultural y pueda, nel so casu, sumase al consensu mayoritariu al rodiu la política llingüística qu'Asturies necesita y demanda".