“Ye necesaria una plataforma amplia, plural y abierta a xente que trabaye dende, por y p’Asturies”, defende Elipe

Escoyíu pola militancia de Podemos pa ser el númberu 2 de la llista eleutoral pa les eleiciones, Xune Elipe tien claro que “ye necesaria una plataforma, un frente, un bloque o como se quiera llamar, amplia, plural y abierta a xente que trabaye dende, por y p’Asturies”. “Tien que ser lo más amplia posible, con asturianistes, federalistes o soberanistes, pa condicionar la política del país”, añade.

Integráu como independiente na candidatura Somos Asturies, que lideraba Cova Tomé, ganadora de les primaries frente a Alba González Sanz, d’En Comuña, Elipe foi la persona más votada ente les persones que se presentaben al cuerpu de la llista. “Taba separtáu de los temes internos del partíu dende que dexé la conceyalía y taba un poco a la espeutativa, pero la sorpresa foi enorme porque los resultaos son mui bonos”, espresa’l de Villalegre a Asturies.com.

“Ábrese un tiempu nuevu, un peridou de reflexón depués de los resultaos. La militancia de Podemos yera consciente de lo que votaba, lo que proponía, el mio posicionamientu políticu, lo que plantegaba…, y foi mui arrogante”, sigue al tiempu que defende “una plataforma, un frente, un bloque o como se quiera llamar, amplia, plural y abierta a xente que trabaye dende, por y p’Asturies a la izquierda de la FSA y que la obligue dende’l minutu 1. Una plataforma que tien que ser lo más amplia posible, con asturianistes, federalistes o soberanistes, pa condicionar la política del país”.

Elipe valoraría de manera mui positiva la participación d’Aína –partíu que celebra mañana’l so Congresu Fundacional–, Izquierda Asturiana (IAS) o asturianistes que nun militen en nenguna formación como actores importantes nesti frente, “porque agora tien que ser el momentu de la reforma del Estatutu pa la oficialidá, pero tamién pa contar con un Estatutu fechu por y pa esti país”. “Ye un momentu crucial”, insiste’l cantante.

Autonomía de Podemos Asturies

A nivel internu, l’avilesín considera que’l resultáu de les primaries “ha servir pa facer reflexonar a la direición política” y “ser otra vez esa formación abierta del entamu, onde nun sobra naide”, en referencia a les espulsiones que se vivieron estos meses. D’igual forma rescampla que, colos resultaos sacaos pola candidatura Somos Asturies, “quedó mui claro que la militancia n’Asturies apostó por que Podemos Asturies tenga la soberanía y l’autonomía pa decidir sobre les cuestiones qu’afeuten a Asturies. Que somos maduros pa tratar los nuesos problemes”, ensin depender de les decisiones de Madrid.

Na semeya, Elipe xunto con Tomé y Lauta Tuero, númberos 1 y 3 de Somos Asturies, de manera respeutiva.