Tomé gana les primaries de Podemos y Elipe va dir de númberu 2 na llista eleutoral pa la Xunta

La candidatura crítica cola direición de Podemos, Somos Asturies, resultó la más votada de les primaries pa la formación de la llista eleutoral de mayu. Cova Tomé sumó 1.565 puntos polos 1.150 d’Alba González Sanz, mentes que Xune Elipe algamó más apoyos al cuerpu y va dir de númberu 2, con Laura Tuero de 3.

En Comuña yera’l nome de la candidatura apoyada pola coordinadora autonómica, Sofía Fernández Castañón, con González Sanz a la cabeza y el voceru parllamentariu Rafael Palacios como númberu 2, que se vio superada pola liderada por Tomé nuna votación na que participaron 2.817 persones. Asina, la valdesana va ser la candidata de Podemos nes Nacionales de mayu.

El más votáu nel ‘cuerpu d’Asturies’ foi Elipe, con 24.057 puntos, siguíos de Tuero, conceyala en Xixón de Podemos-EQUO, con 23.491. El númberu 4 de la llista eleutoral va ser Jorge Fernández Iglesias, con 20.069, quedando como cuartu más votáu Palacios, el primeru d’En Comuña, con 19.080, anque va dir de 6 al corresponde-y el 5 a la edil uvieína Ana Taboada, sétima en sofitos, al ser en cremallera.

La quinta, Adriana del Oso, de Somos Asturies, va ser la númberu 1 pola circunscripción occidental, mentes que Rubén Darío Norniella, tamién de Somos Asturies, el 8, va encabezar la llista nel oriente. Anguaño Podemos cuenta con 4 representantes na Xunta Xeneral, toos pola central, de los que nengún repetiría nel casu de caltener el mesmu númberu d’escaños.

Na semeya, Tuero, Tomé y Elipe, más adelantaos, na presentación de la candidatura Somos Asturies na puerta del Parque Científicu Teunolóxicu de Xixón.