“Ye de xusticia reconocer la importancia histórica que tuvo Conceyu Bable”, afirma González Riaño

Esti xueves l’Academia de la Llingua Asturiana (ALLA) entama n’Uviéu una xornada conmemorativa dedicada a Conceyu Bable baxo’l nome de ‘Xorrecíes tán les manes’. Nel 2024 cúmplense 50 años de la fundación d'esta organización.

El salón de la Biblioteca d’Asturies ‘Ramón Pérez de Ayala’ va acoyer dende les 16 hores la totalidá de la programación prevista pa esta celebración, que va contar cola presentación d’un videu conmemorativu, ponencies, una mesa redonda y una actuación en direuto, con entrada llibre hasta completar aforu. “Pa l’Academia de la Llingua Asturiana, Conceyu Bable foi una organización sociocultural mui importante y determinante dende los años 70 del sieglu pasáu na dignificación de la llingua y la cultura n’Asturies. Consideramos que Conceyu Bable ye la institución, la organización qu’orixina, pola so dinámica y poles sos demandes, la propia Academia de la Llingua Asturiana y tien total sentíu facer esta xornada de conmemoración de los sos 50 años”, apunta’l so presidente Xosé Antón González Riaño, que va encargase d'abrir la xonrada en compañía de Pilar Rubiera.

“Dende’l puntu de vista cultural y dende’l puntu de vista políticu y social, l’apaición de Conceyu Bable va 50 años foi determinante pa la propia configuración d’Asturies como comunidá autónoma, con una llingua, con un estatutu d’autonomía, con una bandera, con unos nicios d’identidá… Y dende llueu ye de xusticia reconocer la importancia histórica que tuvo Conceyu Bable”, siguió’l caderalgu. Un papel clave pa entender l’Asturies actual y pa creer “nes sos posibilidaes de futuru como entidá políticosocial”.

Ésti ye’l programa completu d'esta xornada "d’alcordanza y reivindicación de Conceyu Bable" cola que s'abre "un añu nel que’l mediu sieglu d’aquella asociación va marcar l'axenda del asturianismu cultural y llingüísticu", apunten dende la institución académica:

• 16 hores: presentación a cargu de González Riaño y Rubiera.
• 16.15 hores: videu conmemorativu ‘Xorrecíes tán les manes’, del mediu sieglu de Conceyu Bable na perspeutiva de l’ALLA, presentáu por Inaciu Galán.
• 16.30 hores: ponencia ‘Conceyu Bable: devolver la llingua al pueblu al traviés de la educación’, a cargu de Marcos Rodríguez Álvarez.
• 17.15 hores: ponencia ‘“Y de la casa antigua fadré la casa nueva”: Conceyu Bable y lliteratura’, a cargu de Pilar Fidalgo.
• 18 hores: posa.
• 18.30 hores: ponencia ‘Conceyu Bable: l’apueste por una llingua ensin complexos pal futuru d’un pueblu’, a cargu de Miguel Solís.
• 19.15 hores: mesa redonda con Rubiera, Rodríguez Álvarez, Fidalgo y Solís.
• 19.45 hores: actuación musical de Xaime Martínez y La Familia Tradicional na que se va revisar el Nuevu Canciu Astur.