"Tolo demás, caxigalines": Barbón afirma que "el meyor reconocimientu a Conceyu Bable ye la oficialidá"

El presidente del país acudió a la xornada 'Xorrecíes tán les manes' de l'ALLA polos 50 años de la creación del coleutivu.

Adrián Barbón acudió ayeri a la Biblioteca d'Asturies al homenaxe preparáu pola institución académica a Conceyu Bable. En concreto, presenció la mesa redonda a mou de conclusión colos cuatro ponentes que, previamente, participaran, esto ye, Pilar Rubiera, Marcos Rodríguez Álvarez, Pilar Fidalgo y Miguel Solís, y l'actuación musical de Xaime Martínez y La Familia Tradicional, que revisaron el Nuevu Canciu Astur.

Na puerta d'entrada al edificiu uvieín, el socialista declaró n'asturianu que "el meyor reconocimientu –a Conceyu Bable– que se pue facer, y quiero llanzar esta reflexón al restu de grupos parllamentarios na Xunta Xeneral del Principáu, ye precisamente aprobar la oficialidá del asturianu y del eonaviegu. Tolo demás, caxigalines, que diría mi güela".

Tamién se refirió a Conceyu Bable como un coleutivu "tresgresor" nuna época de cambios y clave pa la "fortalecer la llingua asturiana". Al actu tamién acudió Álvaro Queipo, presidente del Partido Popular (PP), xunto con otros diputaos de la formación; Gaspar Llamazares, conceyal de Convocatoria por Oviedo; Xune Elipe, del equipu de Cova Tomé, parllamentaria eleuta por Podemos; amás de dellos representantes de la Mesa Nacional d'Aína.

Na semeya, Barbón atiende a los medios a la entrada de la biblioteca a Barbón con Antón García direutor xeneral d'Aición Cultural y Normalización Llingüística, y Xosé Antón González Riaño, presidente de  l'Academia de la Llingua Asturiana (ALLA), detrás.