"Yá ye hora de recopilar estos materiales y dar accesu a la historia reciente de la música asturiana", apunta Elipe

La web musicasturiana.com, que nació como una tienda en llinia, ta acabante de reconvertise pa ser una “especie d’enciclopedia del sieglu XXI” sobre la música del país, como señaló’l so coordinador, Xicu Ariza. “Ye’l meyor sitiu pa que tuviera abellugu l’Archivu de la Música Contemporánea Asturiana”, aseguró Xune Elipe, de Goxe.

Lo qu’entamó hai 3 años como un proyeutu pa cubrir “l’ausencia d’un escaparate abiertu al mundu nel qu’amosar la producción discográfica asturiana” da agora un pasu alantre pa convertise nuna plataforma de referencia sobre la música del país. Los 1.800 discos físicos vendíos nesti tiempu, les 1.100 referencies en formatu dixital y los millones de reproducciones ente les diferentes plataformes, con repercusión nun centenar de países, sobrepasando asina toles espeutatives iniciales, son bones razones “pa reformular el proyeutu y amplialu”.

“Hai interés pola música asturiana”, asegura Ariza, magar el vacíu informativu nos más de los medios de comunicación, “y viendo l’actividá diaria que xenera esta escena paeciónos interesante tener ún nel que difundir l’actualidá, afondar nella, xenerar alderique y reflexón”. Xunto a esta estaya, otres como una axenda d’eventos o un directoriu con datos de contautu d’artistes, empreses, festivales, chigres o llocales, ente otres.

“Ye un pasu alantre interesante pa poder siguir xenerando ingresos p’artistes y empreses de la música asturiana y pa siguir promocionándola”, siguió’l so responsable, que punxo enfotu nuna mayor integración de la web, facilitando la navegación. Asina, nuna noticia sobre un grupu facilítase al visitante la posibilidá d’acceder a los sos trabayos calcando nun enllaz al final de la mesma.

Un archivu de dominiu públicu

Ún de los mayores atractivos de la páxina web va ser la presencia na mesma del Archivu de la Música Contemporánea Asturiana (AMCA), basada en materiales d’Elipe, que se va ampliar con aportaciones de particulares y coleutivos. “Tenía que tar ehí, nesta plataforma qu’agora ye l’epicentru del fechu musical asturianu”, aseguró.

“Nun ye un archivu más de música tradicional, de los que yá mui hai bonos archivos con xente mui competente detrás, porque queremos trabayar la música d’espresión asturiana que ye la que nun ye estrictamente tradicional”, esto ye, “música de reellaboración de la tradición, d’autor o que s’esprese n’asturianu o gallego-asturiano, sía del estilu que sía”. Polo tanto, “el formatu tenía que ser distintu”, siguió Elipe.

La fecha escoyida sobre la qu’empezar a trabayar ye’l 1974, añu de creación de Conceyu Bable, “cuando entendemos que se crea la música contemporánea asturiana”. El Nuevu Canciu Astur, la música celta o folk atlánticu, el folk-rock, el rock n’asturianu, la lletrónica…, van tener espaciu nesti archivu “que va tener voluntá de serviciu públicu”.

Asina, les persones que quieran consultalu van poder acceder a ‘Hemeroteca’, con publicaciones que trataren la música asturiana nos sos conteníos, como ‘Payeḷḷa’ de la Escuela de Música y Danza Tradicional de Valdés, ‘Alcordances’ el Conceyu de Gaiteros Asturianos o ‘Al debalu’; o a ‘Inéditos’, con conciertos, grabaciones especiales o maquetes, como la grabación yá disponible del conciertu del 30 aniversariu de Conceyu Bable celebráu nel uvieín Campoamor el 24 de payares del 2004 o la de la Nueche Celta de Corao del 1983, la primera, que será previsiblemente’l próximu conteníu en xubir; pero tamién a cartelería, ente otros. Too ello contestualizao pa facilitar el conocimientu al usuariu.

El llabor pa facer el guión y la documentación de ‘D’ayeri a güei’, serie documental de Goxe Producciones sobre la música asturiana emitida por TPA, permitió a Elipe decatase “tolo que tenía guardáu nel desván”, surdiendo asina la idea del AMCA. “Yá ye hora de que toos estos materiales se recopilen y s’estudien pa que les xeneraciones nueves que quieran tengan accesu a la historia reciente de la música asturiana”, rescampló.

La gran complicación que ta atopando agora Elipe ye la forma de dixitalizar tolos materiales colos que cuenta, al tar éstos en diferentes formatos, munchos yá nun emplegaos n’Asturies, polo qu’esti llabor ha encargase a estudios de fuera del país. Por esti motivu, nestos primeros meses va centrase naquellos más accesibles, como les cassettes.

Texíu empresarial que trabaye pol asturianu

“Ye importante destacar el calter empresarial y profesional d’esta iniciativa”, apuntó darréu Ariza, qu’afirma que “hai que creer que de verdá se pue facer empresa y proyeutos profesionales n’asturianu y que tengan rellación cola música asturiana. Esta escena, como cualquier otra, tien que ser vidable, rentable y tien que furrular, y d’eso tien que tomar conciencia tanto’l públicu, valorándola, respetándola y queriendo y consumiendo música asturiana, como les instituciones a la hora de promocionala y difundila”.

Elipe defendiera enantes la creación d’un texíu empresarial que trabaye pol asturianu, “crear unes sinerxes de collaboración ente pequeñes empreses como les que n’Asturies se dediquen a la producción cultural n’asturianu o asturiana en xeneral”. Una filosofía que Goxe Producciones caltién dende L’Aguañaz, “que ye la de collaborar con otres empreses; nunca veles como competidores, sinón como complementaries”.

El responsable de Musicasturiana, pa finar, punxo tamién en valor la marca Asturies y calificó’l so proyeutu de “novedosu y necesariu. Y esperemos que d’utilidá pa la música asturiana pa crear sinerxes y xenerar nuevos ingresos pa los distintos axentes; y pa promocionar y dar a conocer la música asturiana, que ye lo que más falta fai”.

Na semeya, Elipe y Ariza nel llocal y tienda física de musicasturiana.com n'El Natahoyo, compartíu col comerciu de ropa Puru Remangu.