La web musicasturiana.com amplía'l so proyeutu

|
Cartelu Amosando José Manuel Tejedor y Carlos Rubiera

Amás de tienda, va acoyer l'Archivu de la Música Contemporánea Asturiana y va convertise nun portal d'información especializáu. Tien en marcha una campaña de captación de socios.

La web musicasturiana.com, activa dende payares del 2017 y dedicada a la música d'espresión asturiana, con más de 1.800 CD vendíos y más de 10 millones de reproducciones en plataformes dixitales nesti tiempu, da un pasu alantre. Remocicó'l so espaciu de venta en llinia, onde tien más de 320 artículos a disposición, y va incorporar delles novedaes nes selmanes próximes.

Asina va dar agospiu al Archivu de la Música Contemporánea Asturianu (AMCA), ambiciosu proyeutu desendolcáu con Goxe Producciones a partir de la coleición privada de Xune Elipe; va recoyer tola actualidá sobre música asturiana, con noticies, entrevistes, cróniques o artículos d'opinión; y va incorporar una guía de recursos de la escena. D'igual forma, va continuar col ciclu de conciertos íntimos Amosando pa servir d'altavoz en tol mundu a les novedaes discográfiques asturianes, con actuaciones esti sábadu de Carlos Rubiera presentado 'Asturianaes III' –privada nel llar del cantante– y José Luis Tejedor, 'Miraes', a les 17 hores nel xixonés Toma 3, cola posibilidá de participar nel sortéu d'entraes hasta mañana calcando nesti enllaz.

Col fin de desendolcar toes estes iniciatives y convertise asina na web de referencia especializada na música del país, musicasturiana.com entama una campaña de captación de socios. Presenta trés tarifes añales, de 80, 40 y 15 euros –con rebaxa de promoción hasta'l xueves nes dos opciones primeres a 60 y 30 euros– qu'inclúin regalos, descuento, conteníos esclusivos y participaciones en sorteos.

Contador Estadistiques