XXII Premios de la Crítica: una invitación “a consumir lliteratura fecha n’Asturies”

Sergio Buelga y Ramón d’Andrés recibieron la escultura que sirve como troféu de los XXII Premios de la Crítica de l’Asociación d’Escritores d’Asturies. Éstes foron les intervenciones principales de la gala.

L’Aula Magna del Edificiu Históricu de la Universidá d’Uviéu acoyó la tarde del vienres l’actu d’entrega de los XXII Premios de la Crítica d'Asturies y el XVII Premiu de les Lletres d’Asturies. Alma Hidalgo encargóse de conducir la cita, que tuvo una apertura y pieslle musical de Carmen Brañanova y Diego Bóveda, del Grupo Gijón de Pulso y Púa, y contó cola presencia d’Antón García, direutor xeneral d’Aición Cultural y Normalización Llingüística; José Miguel Arias Blanco, vicerrector de Xestión Académica –el rector Ignacio Villaverde nun pudo asistir finalmente “por motivos d’axenda”– ; y David Álvarez Menéndez, conceyal de Cultura.

La presidenta de l’Asociación d’Escritores d’Asturies, María Esther García López, refirióse a los gallardones como “más qu’un eventu; son un tributu a la creatividá, al inxeniu y al poder tresformador de les pallabres. Nesti mundu cada vez más saturáu de ruíu y tormentes, son los escritores, poetes, críticos y pensadores los que nos recuerden la importancia de la reflexón, la imaxinación y la empatía”.

Dio la norabona a tolos premiaos nesta edición, esto ye, Ramón d’Andrés, col so ‘Una ciencia sin enfotu’ (Trabe) na estaya d’ensayu n’asturiau; Pablo Huerga por ‘Vavilov en España’ (Rema y Vive), n’ensayu en castellanu; Sergio Buelga con ‘¡Milagru!’, en teatru n’asturianu; Laura Camafreita por ‘De Dolores a Lola’, en teatru en castellanu; y Cristina García Marcos, pola serie ‘Pilgrís’ (Velocismo Editorial), en lliteratura infantil, amás de la xixonesa residente en México Carmen Rodríguez Nozal, reconocida col XVII Premiu de les Lletres d’Asturies, y repasó l’actividá de l’asociación nel añu añu últimu. Ente ellos, la valdesana rescampló la participación del coleutivu na fundación de la Conferencia de Asociaciones de Escritores y Escritoras, qu’axunta a 16 de tol Estáu.

“Estos Premios que güei entregamos, son un gallardón, pero son amás una llamada d’atención a la sociedá, invitando a consumir lliteratura de la que se fai n’Asturies”, espresó García López, al tiempu qu’animó a los autores “a siguir creando”.

Teatru y ensayu n’asturianu

Buelga foi’l primeru de los premiaos en recibir el so gallardón. Nuna intervención breve celebró que los cómicos populares, los dramaturgos, “tenemos más sitios onde esponer el nuesu trabayu”, y ente otros munchos agradecimientos, centróse en “un coleutivu, que ye’l mio grupu de teatru, la Compañía Asturiana de Comedies”, yá que “ensin ellos ‘¡Milagru!’ nun fuera posible nin de milagru”.

Avanzada la gala xubió a recibir la so escultura D’Andrés, qu’esplicó que “esti ensayu nun trata del asturianu, ta n’asturianu pero nun trata del asturianu”, pa depués referise a “ún de los fechos que m’aguiyó a escribir el llibru”. “La gran mayoría de los estudiantes qu’acaben la carrera de Lengua Española na Facultá de Filosofía y Lletres de la Universidá d’Uviéu, onde trabayo de profesor, piensen que nel mundu hai llingües primitives, y amás piensen que ye n’Africa onde se falen más estes llingües primitives”, arrancó l’autor d’una ‘Una ciencia sin enfotu. Ensayu sobre la deserción social de la llingüística científica”.

“Pero resulta que la llingüística científica, que ye una ciencia que tien más de 100 años y que la ciencia qu’en teoría s’enseña y inculca a los estudiantes nes facultaes tien demostrao de va cuantísma yá que nun esiste la categoría llingües primitives, qu’eso respuende a un prexuiciu cultural yá superáu. ¿Entós qué ye lo que tamos faciendo mal?”, siguió.

Esto demuestra, pa D’Andrés, que “los descubrimientos de la llingüística científica nun llegaron a la cultura xeneral de la xente y llamentablemente tampoco a una parte de les élites del mundu académicu”. “Ye tremendo, ye una vergüenza comprobar qu’en materia llingüística siguimos allancaos nel pensamientu pseudocientíficu del sieglu XIX”, afirmó.

“En resultes, la igualdá de derechos llingüísticos ta mui lloñe de reconocese a tolos efeutos hasta nes meyores sociedaes democráticos. Xulgamos natural que los falantes d’unes llingües tienen por naturaleza menos derechos que los falantes d’otres llingües. Dientro de 500 años veránnos en materia de derechos llingüísticos igual que nosotros vemos a aquellos racistonos y machucios del sieglu XIX. De too esto trata’l miu llibru”, espresó’l premiáu, que tuvo unes pallabres tamién pa Fernando Álvarez Balbuena, “al que tuvi la suerte de conocer y tratar”.

Homenaxe a Fernando Álvarez Balbuena

Rafael Álvarez Balbuena, fíu de Fernando, recibió un recuerdu en representación de la familia. Y ye que l’Asociación d’Escritores d’Asturies tamién quixo recordar al avilesín pocos meses depués de la so muerte con una llectura de dalgunos de los sos poemes.

Tamién tuvo pallabres pa Fernando, ente otros participantes, el direutor xeneral d’Aición Cultural y Normalización Llingúística, que tuvo “la suerte de conocer por ser una persona estraordinaria, un poeta d’interés y sobre too dalguien qu’al traviés de les sos declaraciones en prensa siempre s’espresó mui llibremente y nos fixo a toos reflexonar sobre los munchos campos del saber qu’a lo llargo de la so vida foi tocando”. García, amás d’agradecer a “l’Asociación d’Escritores la so arrogancia pol trabayu que vien desenvolviendo dende hai décades por poner a los escritores, homes y muyeres, d’Asturies nel sitiu que-yos correspuende”, quixo citar tamién a “una persona cola que compartí bien d’años estos premios, tuvi la suerte d’asistir con él, Jaime Herrero, que desgraciadamente yá nun ta con nós, que ye l’autor d’esos cabezones que s’entreguen como premiu a los gallardonaos y gallardonaes”.

“Foi sobre too pintor. Foi un escultor raru, la única escultura que conozo ye esti troféu que s’entrega y que recibe’l nome de ‘Apolo’ porque nos primero años estos premios s’entregaron yá nel desapaecíu Café Apolo d’Uviéu”, fixo memoria’l tamién escritor, qu’añadió que, “amás d’eses facetes, Jaime Herrero tamién foi un estraordinariu poeta y dexónos unos versos maraviyosos. Nun quería dexar de zarrar les mios pallabres ensin tener esta alcordanza pa Jaime Herrero”.

Na semeya, premiaos, autoridaes y dellos participantes al final del actu.