XXII Premios de la Crítica: D’Andrés y Buelga, gallardonaos nes estayes d’asturianu

L’Asociación d’Escritores d’Asturies entrega los XXII Premios de la Crítica y el XVI Premiu de les Lletres d’Asturies. La so presidenta, María Esther García López, fálanos d’estos gallardones agora biañales.

L’Aula Magna del Edificiu Históricu de la Universidá d’Uviéu acueye esta tarde, dende les 18.30 hores, l’actu, que va tar presidíu pol rector Ignacio Villaverde y va contar con un homenaxe a Fernando Álvarez Balbuena. Pa esta edición nun van premiase los xéneros habituales, novela y poesía, sinón l’ensayu, el teatru y la lliteratura infantil, “que facía tiempu que nun se convocaben y queríamos promocionar, sobre manera’l teatru infantil”, esplica García López, en concreto obres espublizaes ente'l 1 de xineru del 2021 y el 31 d'avientu del 2022.

Ramón d’Andrés, col so ‘Una ciencia sin enfotu’ (Trabe), tamién gallardonáu nel 2022 col XXVII Premiu Máximo Fuertes Acevedo, ye’l ganador n’ensayu n’asturianu. El xuráu formáu por Cristóbal Ruitiña, Xulio Viejo y Aurelio González Ovies decidióse por esta obra por unanimidá por “poner la llingüística al altor d’otres ciencies que paecen ser superiores, pero lo son tanto como esta apuesta sobre un alderique que vien de lloñe: les llingües y los dialeutos son carne d’un mesmu cuerpu y son materia y cuestión clasificatoria de la llingüística científica”.

D’igual forma, valoraron que ye “una reflexón rica y complexa de gran fondura inteleutual. Y ensin arrenunciar al rigor espositivu, nun testu llanu y asequible tanto dende’l puntu de vista llingüísticu como estilísticu, válidu pa cualquier llector, inclusive non especialista nel tema”. En castellanu, el premiáu foi, por mayoría, Pablo Huerga por ‘Vavilov en España’ (Rema y Vive).

Teatru y lliteratura infantil

En teatru n’asturianu foi Sergio Buelga’l merecedor del reconocimientu por ‘¡Milagru!’. Nesti casu’l xuráu tuvo conformáu por Dolfo Camilo Díaz, Natalia Suárez Ríos, Andrés Presumido y, como secretaria, Mirta Chamorro, que tuvo voz, pero non votu.

D’esta comedia popular rescampló “la escoyeta de los personaxes nel desendolcu de l’aición y la intriga qu’apaez nel segundu acto y qu’acompaña al restu de l’aición hasta’l desenllaz final”. En castellanu, la obra ganadora foi ‘De Dolores a Lola’, de Laura Camafreita.

Completen los Premios de la Crítica el de lliteratura infantil, que recayó na serie ‘Pilgrís’ (Velocismo Editorial) de Cristina García Marcos.

Una premiada que dende México “fai abondo pola llingua asturiana”

Esta tarde tamién va entregase’l XVII Premiu de les Lletres d’Asturies a una trayeutoria, que la xunta direutiva de l’Asociación d’Escritores d’Asturies concede a la xixonesa Carmen Rodríguez Nozal. “Ye una autora residente en México que ta asociada y que cuenta con una gran obra poética. Amás dende México fai abondo pola llingua asturiana”, rellata García López.

La presidenta de la entidá destaca d’esta edición “la presencia ente los ganadores d’autores noveles y otros más veteranos” y el nivel de les obres valoraes. “Nun tenemos nada qu’envidiar a les de castellanu y otres llingües d’España”, asegura la valdesana, que defende que “n’Asturies faise bona lliteratura”.

Na semeya, D'Andrés y Buelga.