Xuan Trenor ganó la edición del concursu 'L'Horru del Carbayedo' con más participación

L'uvieín residente en Sabadell presentó'l microrrellatu 'Ruíu', mentes que 'Kudokoshi', de Xosé Nel Riesgo, llevó'l segundu premiu.

Un total de 43 testos de 32 autores participaron nel XIV Concursu de Microrrellatos n’Asturianu ‘L’Horru del Carbayedo’ qu'entama l’Asociación de Vecinos El Hórreo del Carbayedo en collaboración cola Estaya de la Llingua d’Avilés. Según espliquen dende'l coleutivu, foi cuasi'l doble que la edición pasada y la mayor de toles celebraes.

El xuráu conformáu pol escritor, dibuxante y miembru de l'Academia de la Llingua, Miguel Solís; la escritora y esperta en cultura tradicional asturiana, Susana Sela; y l'escritor y presidente del Conceyu de Xóvenes Hestoriadores, Rafael Rodríguez Valdés, coordinaos pol SNL avilesín, que fallaron pol trabayu de Xuan Trenor, presentáu baxo'l nomatu 'Meteco'. Como recompensa, lleva 500 euros y un troféu.

El segundu premiu foi pa Riesgo, que concursó con 'Kudokoshi', pol que l'avilesín residente en Xixón recibe 300 euros y troféu. Dambos asoceden nel palmarés del gallardón a Fernando Martínez Rodríguez y Laura Marcos.

La situación sanitaria impidió nesta edición la esposición de trabayos y la entrega de los premios nun actu públicu. Darréu pue lleer el testu ganador, 'Ruíu':