El día 1 fina’l plazu pa presentar rellatos al 'L’Horru del Carbayedo'

|
L'horru del Carbayedo

L’Asociación de Vecinos El Hórreo del Carbayedo, en collaboración cola Estaya de la Llingua d’Avilés, convoca’l XIV Concursu de Microrrellatos n’Asturianu ‘L’Horru del Carbayedo’. El 1 d’avientu ye’l día postreru pa unviar trabayos, tando prevista la entrega de premios y una función de teatru’l 18 na Casa Cultura.

Los rellatos, de temática llibre, han tener un llargor máximu de 500 pallabres. L’unvíu fadráse per corréu electrónicu nun archivu Word encabezáu con un títulu y firmáu con nomatu, axuntando otru colos datos reales del autor: nome, teléfonu, señes, DNI y títulos presentaos al concursu.

El plazu fina a les 14 hores del 1 d’avientu y la direición onde mandar los trabayos ye avvelhorreo@yahoo.es. El xuráu va aconceyar el día 4 pa decidir les creaciones merecedores del primer premiu, valoráu en 500 euros, y del segundu, en 300, amás de troféu pa dambos.

Si la situación sanitaria del momentu lo permite, del 9 al 18 van tar espuestos na Casa Cultura d’Avilés tolos rellatos presentaos. Los ganadores van recibir les sos recompenses y lleer los sos trabayos nun actu programáu pal mesmu día 18, a les 19 hores nel auditoriu de la instalación, na que se va representar tamién, como ye vezu, una obra de teatru n’asturianu.

Pa poder asistir va ser necesario retirar invitación. Éstes podrán retirase nes oficines de l’asociación vecinal avilesina los díes 10, 15 y 17 nel casu de que se pueda desendolcar la entrega de premios con normalidá.

Ganadores del 2019

L'añu pasáu'l rellatu escoyíu pol xuráu como merecedor del primer premiu foi 'El güelu', del avilesín Fernando Martínez Rodríguez, que se presentó col nomatu 'Valdesoto'. El segundu recibiólu 'L'amor perdíu', de la mierense Laura Marcos, que participó como 'Nel Filo'.

Contador Estadistiques