Xixón Sí Puede propón un Plan municipal de Normalización Llingüística

La organización diz que les ordenances y el plan vixente dende 2008 nun se tán cumpliendo - Pide un plan nuevu qu'entre en vigor en 2016 - Recuerda l'apoyu popular y la tradición d'usu del asturianu nel conceyu

Na pasada llexislatura la normalización, el fomentu y l'usu de la Llingua Asturiana reculó con al respective de otres llexislatures,  según manifestó'l voceru del grupu municipal de Xixón Sí Puede, Mario Suárez del Fueyo.

Xunto con esto, el conceyal recordó que'l Plan de Normalización Social vixente nel conceyu de Xixón “nunca se llegó a aplicar por nenguna de los dos corporaciones anteriores y amás tien de ser revisáu”.

Del Fueyo recordó tamién la tradición de Xixón nel usu y fomentu del asturianu dende va sieglos, (con figures como Xovellanos, que falaba de la llingua asturiana como “la llingua viva del nuesu pueblu” y como Xuan Junquera Huergo, alcalde de la ciudá nel sieglu XIX, qu'editó na nuesa ciudá en 1843 el primer llibru escritu íntegramente n'asturianu), y apuntó tamién el sofitu de la población a midíes d'esti tipu, como quedó patente na encuesta sociollingüística realizada en 2006 pol Conceyu de Xixón.

Sicasí, el conceyal recordó “la situación de peligru del asturianu y la falta de tresmisión interxeneracional, qu'obliga a actuar a les alministraciones pa protexer el nuesu patrimoniu cultural”.

Con esta fundamentación y "la voluntá del grupu integráu por Podemos Xixón y Equo d'escosar toles posibilidaes que la Llei de Normalización del Asturianu dexa", la formación municipal presentó'l so Plan Estratéxicu d'Usu de la Llingua Asturiana que van presentar al próximu plenu de la Corporación.

Nel mesmu proponen qu'esti plan afite les prioridaes, los oxetivos, el indicadores, los ámbitos d'actuación, los recursos, los plazos y los mecanismos de siguimientu pa la normalización llingüística del conceyu con una temporalización de dos o cuatro años.

El plan impulsáu apunta a visibilizar “la llingua asturiana na nuesa sociedá, nes rellaciones ente ciudadanos y ciudadanes y l'Alministración, nos medios de comunicación, nos anuncios y comunicaciones del Equipu de Gobiernu cola sociedá, na publicidá institucional, nos eventos entamaos poles empreses municipales” estendiendo la suxerencia de la presencia del asturianu nos eventos que subvencione, y que defina midíes pa la recuperación del patrimoniu llingüísticu hestóricu de Xixón y la tresmisión xeneracional de la llingua propia”.

Suárez del Fueyo informó amás qu'otru de los puntos de la iniciativa ye l'impulsu al empléu de la toponimia oficial del Conceyu, según el fomentu del usu social del asturianu y les actitúes positives al respective de la mesma, favoreciendo'l so usu n'ámbitos empresariales, deportivos, sindicales, artísticos y como vehículu d'espresión cultural”.

Pa implementar esti plan, qu'entraría en vigor nel añu 2016, el conceyal valoró que ye preciso dotar a la Oficina de Normalización Llingüística del personal y los recursos necesarios pa llevar alantre esti trabayu, y aplicar les ordenances en vigor hasta que s'aprueben otres.

Finalmente, Suárez del Fueyo reclamó como fundamental “que'l plan contenga una afayadiza temporalización que pueda ser evaluada semestralmente técnica y políticamente pa garantizar la so meyora y el cumplimientu de los oxetivos trazaos”.

La propuesta va presentase nel próximu plenu del 10 de setiembre.