"Los pasos que da Xixón cola llingua tienen importancia n’otros llaos"

Jesús Montés Estrada dixo que l’asturianu tien que ser oficial, afirmando amás que los pasos que dan en Xixón cola normalización de la llingua tienen importancia n’otros llaos.

El conceyal de Cultura Tradicional y Llingua de Xixón dixo estes pallabres na presentación del material didácticu ganador del cuartu concursu ‘Vas velo, trebeyos pal aula’, oganizáu pola Oficina Municipal de la Llingua

Montes Estrada quixo reconocer delantre de María Xosé Rodríguez López, responsable del serviciu de normalización local, el so esfuerzu pa facer coses como esti concursu  nel que participaron los Institutos d’Enseñanza del conceyu. “Ye un llabor fundamental, por muncho que temos enfotaos na normalización nun vamos consiguir nada ensin los escolinos y los maestros d’asturianu”, afirmó.

El Conceyal dixo que diben defender siempre la oficialidá, “dalgo que políticamente falando ye una batalla”. Sicasí, apuntó que hai grandes enemigos que lluchen pa que la llingua nun seya dalgo normal, “estos enemigos tienen gran poder y ponen disculpes a la oficialidá”.

Montes Estrada dixo qu’había muncha xente trabayando en Xixón pa que l’idioma del país tenga usu na ciudá más grande d’Asturies. Amás, solliñó que los pasos que daben na villa de Xovellanos no que cinca a la normalización social de la llingua teníen importancia n’otros llaos.

Trebeyos pal aula de los propios escolinos

Esti añu yera la cuarta edición del concursu ‘Vas velo, trebeyos pal aula’, siendo ganadores ‘Asturies, paraisu mitolóxicu’, ellaboráu polos escolinos de 3u d’ESO del IES Calderón de la Barca, y ‘La Quinta del tíu Vallín” de 3u d’ESO del IES Fernández Vallín.

El concursu consiste na preparación de materiales escolares pa trabayar la llingua nel aula. Presentáronse mozos de dellos institutos de la ciudá y el premiu consistió nun viaxe a Miranda l Douro pa los ganadores y la publicación de los trabayos ganadores.

El xuráu taba formáu por Urbano Rodríguez de l’Academia de la Llingua, Fernando Padilla de la Conseyería d’Educación, Montse Machicado de la Estaya de Llingua d’Avilés, y María Xosé Rodríguez de la Oficina de la Llingua de Xixón.

Los miembros del xuráu valoraron positivamente la presentación ellaborada y orixinal d’entrambos trabayos, los temes variaos de los conteníos y centros d’interés que planteguen, que van dende la lliteratura hasta la gramática, pasando pela xeografía, los refranes, la mitoloxía y la historia d’Asturies.

El xuráu entendió tamién que son entreteníos y didáuticos, colo que puen ser una bona ferramienta pa les clases de los caberos cursos d’Educación Primara, ESO y Bachiller, “ufren la posibilidá de trabayar la espresión oral en distintes situaciones de comunicación, xueguen tamién col pallabreru y planteguen cuestiones que posibiliten el conocimientu del patrimoniu cultural asturianu”, señaló María Xosé Rodríguez.

La responsable de la llingua en Xixón quixo finar animando a los escolinos a siguir apuntándose a clases d’asturianu, “anque seya difícil l’asturianu siempre ta na matricula”. Al empar, tamién animó a usar davezu l’asturianu fuera de les clases de llingua.