Xeira llama a “repensar” la propuesta d’oficialidá del Gobiernu no tocante al estatus del gallego-asturiano

La propuesta d’oficialidá del asturianu llanzada pol Gobiernu pa la reforma del Estatutu, “con un tratamientu similar pal eo-naviego nel so esclusivu ámbitu territorial”, supón pa Xeira “úa rebaxa" del estatus del gallego-asturiano. Fai una llamada “a os demáis partidos políticos y a os socialistas del occidente a defender a igualdá das dúas llinguas propias d’Asturias nas negociacióis”.

“É chamadeiro qu’a proposta nun diga miga del ámbito territorial da oficialidá del asturiano y si deixe claro qu’el outra llingua propia d’Asturias nun vai tar reconocida al mesmo nivel”, apunta nun comunicáu nel qu’esplica que la so demanda “nun se trata, por poñer un caso estremo, de que se rotule en gallego-asturiano el consultorio médico de Cangues d’Onís”, sinón “de recoyer nel Estatuto d’Autonomía a oficialidá en Asturias das dúas llinguas pra que despóis úa llei de normalización delimite os ámbitos territoriales d’uso”. Considera Xeira que “iba ser un reconocemento simbólico importante porque amostraría a sensibilidá polas minorías y el respeto á pluralidá llingüística d’Asturias”.

Una demanda vieya d’ésti y otros coleutivos del occidente, que quedó reflexada nel documentu ‘Por un trato igualitario na oficialidá de gallego-asturiano y asturiano’, firmáu nel 2018 por más de 300 personas de la fastera, y na declaración conxunta presentada en Tapia nel 2019 por Xeira y la Xunta pola Defensa de la Llingua Asturiana (XDLA). “Femos úa chamada á repensar esa proposta y a qu’os demáis partidos fagan recapacitar al Goberno de Barbón. Tampouco nun poden quedar callaos os dirixentes socialistas del occidente. Esperamos qu’el resultao final das negociacióis nun sía ese. Iba ser úa ironía qu’el cambeo d’actitú da FSA al recoyer úa reclamación histórica del movemento de reivindicación llingüística tuvera como resultao colateral minusvalorar nel Estatuto os deretos dos falantes de gallego-asturiano”, asegura.

Na semeya, pancarta de la Plataforma pola Oficialidá del Gallego-asturiano, na que participa Xeira, na manifestación de la XDLA pol Día de les Lletres Asturianes del 2019, la última celebrada enantes de la pandemia.