Xabel Vegas ufierta al PP negociar una "fórmula d'oficialidá amable"

Cómo, ónde y por qué de la so propuesta al presidente popular Álvaro Queipo.

El voceru de Convocatoria por Asturies, Xabel Vegas, dirixóse na sesión d'ayeri na Xunta Xeneral al Partido Popular (PP) pa ufrir "una mano tendida pa que podamos trabayar xuntos en defensa del nuesu patrimoniu llingüísticu, porque amás me consta que dalgunos de los diputaos de centroderecha d'esta Cámara son sensibles a la situación del asturianu y del eonaviego na nuesa comunidá autónoma". Foi na defensa de la proposición non de llei "sobre adhesión y aplicación de la ‘Declaración de Bimenes’ del Conseyu de la Rede de Normalización Llingüística, en defensa de les llingües propies d’Asturies, con motivu del Día Internacional de la Llingua Materna” presentada xunto cola FSA-PSOE, y aprobada colos votos de Foro y Cova Tomé (24), l'astención del PP (17) y la oposición de VOX (4).

"Cuesta entender por qué lo que sirve pa Galicia nun-yos sirve p'Asturies; cuesta entender tamién que se nieguen vustedes siquiera a abordar l'alderique sobre'l modelu d'oficialidá, porque dicen que nun son partidarios de la oficialidá, pero ¿a qué modelu d'oficialidá se refieren? La nuesa propuesta ye clara y honesta: sentémonos y busquemos ente toos un modelu d'oficialidá col que puedan sentise cómodos; atopemos una fórmula d'oficialidá amable que permita construyir un gran pautu pol nuesu patrimoniu llingüísticu que, amás, saque a los nuesos idiomes del alderique políticu partidista", propunxo Vegas.

Darréu, el políticu de la coalición por Más País, recordó que "va non tanto Cherines proponía aquello de la oficialidá en diferío. Pierdan vustedes el mieu a la pallabra cooficialidá, que nun ye más que la reconocencia d'una realidá llingüística y alderiquemos sobre'l so conteníu real. Nun dexen que'l significante nos impida falar de lo verdaderamente importante".

"Una propuesta sincera y honesta"

"Más tarde o más temprano vustedes acabarán entiendiendo la importancia del idioma y de los idiomes p'Asturies. Porque miren, asocedió tamién col Partido Socialista, un partíu que, nel so día, foi la formación más combativa contra la oficialidá y torgó la reconocencia del asturianu como llingua oficial hasta'l so congresu del 2017. Si'l Partido Socialista tardó 40 años n'entender el so error y enmendalu, esperamos que vustedes nun tarden 80 años en siguir esa mesma sienda".

Finó'l so discursu Vegas "reiterándo-yos la nuesa mano tendida pa construyir un gran pautu en defensa del patrimoniu llingüísticu asturianu. Ye una propuesta sincera y honesta, y esperamos que nun caiga en sacu rotu".