La Xunta Xeneral aprueba la ‘Declaración de Bimenes’ en defensa de les llingües propies: el PP posicionóse na astención

La ‘Declaración de Bimenes’, que llama a “reconocer l’asturianu y l’eonaviegu como derechos culturales inherentes”, lo que “pasa pela declaración d’oficialidá d’estos dos idiomes”, aprobóse na Xunta Xeneral na sesión del Plenu celebrada esti miércoles. El Partido Popular (PP) astúvose nuna votación na que namái s’opunxo VOX.

Los dos partíos del Gobiernu, FSA y Convocatoria por Asturies, treslladaron al Parllamentu una proposición non de llei "sobre adhesión y aplicación de la ‘Declaración de Bimenes’ del Conseyu de la Rede de Normalización Llingüística, en defensa de les llingües propies d’Asturies, con motivu del Día Internacional de la Llingua Materna”, que sumó los apoyos de Foro y de Cova Tomé, diputada eleuta por Podemos. En total salió alantre con 24 votos a favor, 4 en contra y 17 astenciones, anque na práutica nun significa nada al nun haber entovía consensu pa los dos tercios de la Cámara (27 diputaos) que seríen necesarios pa facer efeutiva una reforma del Estatutu qu’incluyera la oficialidá que reclama’l testu aprobáu en Martimporra’l 20 de febreru, un día enantes del citáu Día Internacional de la Llingua Materna.

Abrió la defensa de la propuesta la diputada socialista Noelia Macías, qu’emplegó l’asturianu y el gallego-asturiano. “Solicitamos l’adhesión d’esta Cámara a dicha declaración pa llograr el máximu consensu posible, encamentando al Gobiernu d’Asturies a aplicala y cumplir colos sos oxetivos”, espresó, pa depués, como apunta’l testu aprobáu en Bimenes, apuntar que’l reconocimientu de les llingües propies del país “como un patrimoniu únicu d’Asturies, como una herencia cultural coleutiva” pasa “pola declaración d’oficialidá –camudando d'idioma– col fin de contar coas mesmas condicióis que el resto das llinguas cooficiales d’España”.

“Esta declaración ye una llamada al diálogu, al entendimientu, al consensu. L’asturianu y l’eonaviegu han ocupar el llugar que-yos correspuende y ello pasa pola oficialidá, señoríes, ye la nuesa obligación”, siguió la diputada, que pidió al PP “valentía y coraxe” y que mirase pa Galicia “pa tomar exemplu de los sos compañero gallegos, arguyosos de la so cultura y de defender el gallegu. Dexen atrás esa posición afitada nel non a les llingües propies d’Asturies y nel non a la oficialidá, y súmense a la defensa real y con fechos del asturianu y del eonaviegu”.

Por Convocatoria por Asturies tomó la pallabra Xabel Vegas, que nesta ocasión escoyó espresase en castellanu al non compartir “esa forma de rellacionase col idioma qu’a veces vemos nesta Cámara con demasiada frecuencia según la que s’utiliza sólo l’asturianu nes instituciones públiques cuando se trata de falar de la llingua asturiana, como si la llingua asturiana fuese una especie de metaidioma que sirve sólo pa falar de sí mesma”. “Rebelámonos énte esa forma d’entender el nuesu idioma y creemos que tanto l’asturianu como l’eonaviego son llingües de plenu derechu que sirven pa falar de política llingüística, pero tamién de fiscalidá o infraestructures”, reivindicó.

Sobre la ‘Declaración de Bimenes’, fixo una llamada “a tolos partíos democráticos en defensa d’esi patrimoniu llingüísticu de tolos asturianos y toles asturianes. Una defensa que pasa necesariamente pola declaración d’oficialidá, que ye l’instrumentu normativu que pue garantizar la proteición de los nuesos idiomes”, pa dirixise darréu “a les señoríes del grupu parllamentariu popular. Quiero facelo con una mano tendida pa que podamos trabayar xuntos en defensa del nuesu patrimoniu llingüísticu”.

“Cuesta enteder por qué lo que sirve pa Galicia nun sirve p’Asturies. Cuesta entender tamién que se nieguen vustedes siquier a abordar l’alderique sobre’l modelu d’oficialidá”, siguió Vegas, qu’aseguró que “la nuesa propuesta ye clara y honesta: sentémonos y busquemos ente toos un modelu d’oficialidá col que vustedes puedan sentise cómodos”.

Oportunidá tanto nel ámbitu cultural como económicu

L’otru diputáu qu’emplegó l’asturianu nesti puntu de orde del Plenu de la Xunta Xeneral foi Adrián Pumares, de Foro. El llavianés afirmó que “la convivencia n’Asturies del castellán col asturianu y l’eonaviegu, lloñe de ser una amenaza, ye una oportunidá tanto nel ámbitu cultural como económicu”.

“Prohibir l’asturianu nes instituciones y facer por que muerra namás que llogra producir un sentimientu negativu d’autoodiu y de falta d’enfotu nes propies posibilidaes que trai consigo una emigración brutal y una d’emprendimientu que resulten mortal”, rescampló Pumares, que considera “perimportante que toles alministraciones, dende los ayuntamiento a esta Xunta Xeneral, muestren el so compromisu y el so respetu a les llingües propies d’Asturies. Y esto ye lo que fai, dende’l pasáu 20 de febreru, la ‘Declaración de Bimenes’”.

Tomé amosóse mui crítica na so intervención pol fracasu de la negociación pa la reforma del Estatutu d’Autonomía de la llexislatura pasada pa incluyir la oficialidá, “con unos responsables mui claros”, a los qu’acusó de “falta de perspeutiva histórica”, “empezando pola dexadez paralizante del que tenía que presentar una propuesta sobre la qu’aldericar, pasando poles esixencies inaudites del que queria consiguir otres cuestiones poniendo preciu a la oficialidá, y terminando pol que nun tuvo la suficiente cintura política negándose a negociar lo que sí fixo más alantre”. Enante referíase a la esistencia d’un “conflictu llingüísticu que va siguir hasta que nun-y demos una solución política, y eso-y correspuende a esta Xunta Xeneral.

Al igual que’l so compañeru del grupu mestu, defendió al asturianu y al gallego-asturiano “como una oportunidá” con una “repercusión económica que nun podemos desaprovechar”. “Nun tenemos oficialidá, pero eso nun signfica que nun podamos facer una política llingüística atractiva, ambiciosa y realmente útil”, dirixóse al Gobiernu, al que pidió que “utilicen tolos medios que tienen al so alcance: alministración, conseyeríes, RTPA, educación…”, pa finar espresando que “bienvenía la ‘Declaración de Bimenes’, a la que por supuesto votaremos a favor”.

VOX niega un futuru apoyu a Queipo “si se pasa al otru bandu”

Per parte de VOX faló Javier Jové, que nun perdió la so oportunidá de tratar de llamar l’atención. Con una camiseta de la Plataforma contra la Cooficialidá baxo la chaqueta emplegó los argumentos habituales del so partíu y llanzó un mensaxe al popular Álvaro Queipo: “Esta proposición non de llei nun va con nós, va colos señores del Partido Popular. Vustedes tán apretando a ver si claudica aprovechando la llegada del señor Queipo, que ta despertando munches duldes, muncha incertidume y muncha preocupación ente los sos propios votantes”, principió pa depués avisar al presidente del PP de que “si se pasa al otru bandu nun va ser presidente d’Asturies porque nun va contar col nuesu votu”.

José Luis Costillas intervieno como voceru del PP nesta cuestión, criticando en primer llugar que fora’l Conseyu de la Rede de Normalización Llingüística’l que fixera una declaración qu’entiende de “intencionalidá política”. Apuntó que ye “la grosera respuesta del Partido Socialista y el so sociu a la reciente visita del presidente del Partido Popular a l’Academia de la Llingua, nin más nin menos”, pa depués reivindicar la Llei d’Usu y Promoción del Bable/Asturianu, escaeciendo una vegada más al Partíu Asturianista (PAS), “que supón el mayor y únicu reconocimientu, y la única midida de proteición que se-y dio a les llingües asturianes na historia d’esta comunidá autónoma”.

“El Partido Popular tienlo claro: diz sí al asturianu y non a la cooficialidá”, aseguró l’ex de Ciudadanos, que repitió’l discursu de Queipo na rueda de prensa que dio xunto con Xosé Antón González Riaño, presidente de l’Academia de la Llingua Asturiana, llueu del aconceyamientu cola institución na visita al so llar social.

Na semeya, xunta constitutiva del nuevu Conseyu de la Rede Normalización Llingüistica, que presidió Adrián Barbón y nel que s'aprobó la 'Declaración de Bimenes' a propuesta del alcalde del conceyu, Aitor García Corte.