Viejo va poner na 'Semana Negra' una charra entitulada 'L'inventu de la llingua'

Rafael R. Valdés y Samuel Castro presenten nel certame lliterariu la obra infantil 'Animatopeyes'.

Esti martes la llingua asturiana va ser protagonista na XXXVI 'Semana Negra', que se vien celebrando nos terrenos de Naval Xixón dende'l vienres y que va allargase hasta'l domingu. A les 19.30 hores la 'Carpa A Quemarropa' va acoyer una actividá del Aula SN, en collaboración col Vicerrectoráu d'Estensión Universitaria y Proyeición Cultural de la Universidá d'Uviéu, que va consistir na charra entitulada 'L'inventu de la llingua' a cargu del profesor Xulio Viejo, autor de ‘La llingua n’Asturies al traviés de los sieglos’, que va abrir Rubén Vega.

Una hora enantes, na 'Carpa de la Palabra', va tener llugar la presentación de 'Animatopeyes', obra editada por Trabe. Cola introducción d'Ester Prieto, los sos autores van fallar d'esti llibru pa prellectores que xuega coles onomatopeyes que faen animales.

Trabe ta presente un añu más na 'Semana Negra' con puestín propiu, onde poder atopar los munchos títulos del so catálogu. Amás programa firmes diaries d'autores, esta tarde a les 19 hores con Rodríguez Valdés y Castro.

Na semeya, carpa nueva a la entrada del recintu onde tán los puestos de llibreríes y editoriales, y d'artesanía.