‘Hai un debate mui encesu sobre la cuestión llingüística y esti llibru sirve de referencia p’afrontalu”, apunta Viejo

|
Cubierta 'La llingua n'Asturies al traviés de los sieglos' de Xulio Viejo

Esti miércoles preséntase n’Uviéu ‘La llingua n’Asturies al traviés de los sieglos’, un llibru que ye una ampliación de la completa guía-catálogu de la esposición itinerante ‘Voces’ que viaxó pel país nel 2018 y 2019. Xulio Viejo ye l’autor d’un obra que fai un percorríu a la evolución del llinguaxe dende la prehistoria a l’actualidá focalizáu nel asturianu.

La Conseyería de Cultura, Política Llingüística y Turismu ye la impulsora d’esti trabayu, editáu por Trea cola collaboración del Ministeriu de Cultura y Deporte, “que naz de la esposición de la que fui responsable, que como toles esposiciones son efímeres, pero que contaba con una guía-catálogu que funcionó mui bien, al igual que la propia esposición. Entendieron que yera necesario una versión ampliada más consistente, más sólida, que sirva de referencia pal debate públicu”, esplica Viejo.

Nesi sen, apunta que “hai un debate mui encesu sobre la cuestión llingüística, non necesariamente basáu n’aspeutos intelectuales, y esti llibru sirve de referencia p’afrontalu”. ‘La llingua n’Asturies al traviés de los sieglos’ ye un trabayu filolóxicu-históricu que “pretende llegar al públicu mediu” con “una serie d’informaciones mui básiques y ordenaes” qu’apurren una base pal conocimientu y la reflexón crítica sobre lo que la llingua asturiana representa socialmente.

En definitiva, una ampliación del discursu espositivu de la guía-catálogu de ‘Voces. La llingua n’Asturies al traviés de los sieglos’ con más incidencia en dellos de los conteníos, como la introducción. El llibru, amás, incorpora los materiales gráficos de la muestra.

Nel Edificiu Históricu de la Universidá d’Uviéu

La presentación de la ‘La llingua n’Asturies al traviés de los sieglos’ va tener llugar esta tarde a les 19 hores nel Aula Escalonada Severo Ochoa del Edificiu Históricu de la Universidá d’Uviéu. Viejo va tar acompañáu pola periodista Pilar Rubiera nel actu, al que va asistir el direutor xeneral de Política Llingüística, Antón García, en representación de la conseyería.

Contador Estadistiques