Uviéu y Sporting van entamar la Lliga en Tenerife y Valladolid

El primer derbi, nel Tartiere na xornada 5.

Esti meudía sortióse na Ciudad del Fútbol de Las Rozas el calendariu –un añu más asimétricu– de Segunda División. L'Uviéu va tener que garrar l'avión na primer xornada (13 d'agostu) para dir hasta Tenerife, desplazamientu que de xuru va coincidir coles vacaciones de munchos siguidores azules na islla, mentes que'l Sporting va facer usu del autocar pa dir hasta Castilla pa xugar col Valladolid, equipu recién descendíu.

Los dos equipos solicitaron entamar fuera poles obres nel Carlos Tartiere Nuevu y pol cambiu de prau n'El Molinón. El primer partíu como llocal de los d'Álvaro Cervera van ser la fin de selmana siguiente col Racing Club Ferrol, que va ser el siguiente rival del Sporting –l'Uviéu va dir a El Plantío pa enfrentase al Burgos CF–, mentes que los de Miguel Ángel Ramírez van recibir al Mirandés.

El primer derbi va tener llugar pronto, el 10 de setiembre en La Ería, a la puerta de les fiestes de San Mateo. Mentes, la vuelta va cayer na xornada 26, el 11 de febreru.

Uviéu y Sporting van finar la competición fuera de los sos campos. Los azules van recibir al Andorra na penúltima xornada pa depués viaxar a Eibar, mentes que los roxiblancos van xugar col equipu armeru n'El Molinón pa zarrar la temporada na Comunitat Valenciana col Eldense.