El Sporting arranca la Lliga cola xera por facer, al contrario que l'Uviéu

Los roxiblancos viaxen a Valladolid y los azules a Tenerife na primer xornada de competición.

Esti vienres arranca la Segunda División, LaLiga Hypermotion V por temes de patrociniu, con un Amorebieta-Levante (19.30 hores, campu 2 de Lezama), al que va siguir el Valladolid-Sporting (21.30 hores, José Zorrilla). L'Uviéu va tener qu'esperar hasta'l llunes pa enfrentase al Tenerife (21.30, Heliodoro Rodríguez López), partíu que va zarrar la xornada.

Los dos equipos asturianos del fútbol profesional lleguen al entamu en situaciones bien diferentes. Los d'Álvaro Cervera foron madrugadores y el téunicu nacíu en Malabu tien l'equipu fechu dende va selmanes, mentes que Miguel Ángel Ramírez perdió al so meyor home, Pedro Díaz, vendíu a un Girondins de capa cayida, en Segunda División y pretendiendo salir d'una situación económica que cuasi lu lleva a la tercer categoría del fútbol francés, nun tien repuestu entovía y nagua por un central, que paez que va ser Pascanu (Ponferradina), y un delanteru.

Seoane (Getafe) ye la principal incorporación del Uviéu, anque nun va poder xugar esta primer xornada al ser xugador ficháu por Pachuca y cedíu a los uvieínos, polo que ta pendiente de que'l xugador faiga'l trámite en México. Moyano (Lugo), Alemão (Internacional), Romario Ibarra y Paulino (Pachuca), y Leo Román (Mallorca) son los fichaxes xunto con Álex Millán (Villarreal B), que tuvo la mala fortuna de mancase de gravedá na xira mexicana, mentes que Borja Sánchez (Club León) ye la baxa más importante xunto cola de Sergi Enrich (Zaragoza), llistáu nel que tamién apaecen Tomeu Nadal (Tenerife) o Manu Vallejo (Girona).

Per parte del Sporting, llegaron Yáñez (Málaga CF), Hassan (Villarreal B) y Róber Pier (Levante), amás de los cedíos, ente los que rescampla Villalba (Málaga CF). Mentes, salieron Aitor García (Juarez), Pol Valentín (Sheffield Wednesday), Marsà (Andorra), Cristo (Arouca) y Jony (Lazio), amás de la non renovación de Cuellar y Bruno y el trespasu de Pedro.

Nun acabó entovía'l mercáu pa los xixoneses, pendientes de Pascanu y d'otres incorporaciones p'afitar un equipu. El club busca un delanteru, pero dende fuera paez clara la necesidá d'un sustitutu pal mediocampista de la Urbanización de La Fresneda que tomó rumbu a Francia.

Por contra, l'Uviéu, a falta de dalguna otra posible llegada, da entamu a la temporada con otra perspeutiva y meyores sensaciones. L'oxetivu, nos dos casos, ye lluchar pol ascensu, pero l'horizonte pa los de Cervera paez más escampláu, a lo menos nel primer mes de competición, col derbi cerca, fecháu yá pal sábadu 9 de setiembre nel Tartiere (18.30 hores).

Na imaxe, logu nuevu de LaLiga y apellíu comercial.