Uviéu y Sporting empiecen la Lliga sumando un puntu

Los azules merecieron más énte l'Extremadura UD, mentes que los roxiblancos empataron el so partíu d'Alcorcón in extremis.

Nun pudieron arrancar la Lliga con victoria los dos representantes asturianos na Segunda División. Nin Uviéu nin Sporting pasaron del empate nes sos confrontaciones, un puntu que dexa saborgos diferentes n'El Requexón y en Mareo.

El conxuntu de Juan Antonio Anquela tuvo mui cerca de la victoria énte'l debutante Extremadura, pero la falta d'aciertu y les bones intervenciones de Manu García permitieron a los estremeños tornar a Almendralejo con recompensa. Adelantarónse pronto los carbayones, nel minutu 10, con una bona definición de Toché, qu'aprovechó un serviciu perfeutu de Mossa.

Pese a les munches ocasiones xeneraes pol Uviéu, nel que destacaron Saúl Berjón y el fichaxe Javi Muñoz, el gol llegaría na portería defendida por Alfonso Herrero y a balón paráu, como nun podía ser d'otra forma visto'l desarrollu del partíu. Nel minutu 75 l'ex sportinguista Álex Barrera cazó nel segundu palu un balón rematáu por Willy nun corner y ponía nel marcador el definitivu 1-1.

Golazu de Sousa

Esi mesmu resultáu firmólu'l Sporting n'Alcorcón nun choque llamáu a finar ensin goles que namái destacó polos dos tantos de guapa execución que llevaron el nome d'Álvaro Peña y Sousa. El del portugués, que salió dende'l bancu, llegó nel aliendu últimu, cuando l'árbitru disponíase a pitar el final del choque.

Tres una primer parte aburrida, el partíu nun s'animaría hasta la segunda con un disparu llonxanu de Bellvís que salvó con apuros Mariño. Nel 67, Álvaro Peña si superaría al meta gallegu con un tiru con violencia dende la frontal, lo qu'obligó a Baraja a mover el bancu pa dar entrada a Sousa, Neftali y al xuvenil Pelayo Morilla, que debutaba con 17 años cumplíos recién.

Los cambios dieron otru aire al Sporting, que consiguiría salvar un puntu na llende del minutu 93, cuando Sousa baxó un balón que cayía del aire a 35 metros de la portería, dexábalu botar y enganchábalu cola zurda pa batir a Dani Jiménez. Un gol que salva a los xixoneses de comenzar la Lliga con derrota pero que nun tapa les munches carencies d'un equipu que sigue en construcción en plena competición.

Noblejas, refuerzu pa Baraja

Rubén Baraja yá cuenta con un recambiu pal llateral izquierdu. Trátase de Javi Noblejas, xugador del Rayo formáu nes categoríes inferiores del Madrid y que la pasada campaña tuvo cedíu nel Córdoba, onde namái disputó un partíu.

El xugador madrilanu coincidió media temporada col téunicu xixonés nel Elche, na campaña 2015-2016 cuando llegó cedíu pol Getafe nel mercáu d'iviernu. Cola so llegada, el Sporting cuenta con dos xugadores pal llateral izquierdu, onde namái tien un efeutivu, Canella, cola opción del xugador del filial Cordero.

De 25 años, Noblejas firma col club roxiblancu por un temporada, con opción d'ampliar el contratu por otres dos. Miguel Montes Torrecilla definió al madrilanu como un xugador ofensivu "al que-y gusta progresar pela banda ensin dexar de ser solvente atrás".