Sporting y Uviéu afronten el comienzu de la temporada con sensaciones diferentes

Los roxiblancos viaxen a Alcorcón ensin delanteru específicu, mentes que los azules conserven el bloque del añu pasáu.

El Sporting más internacional que se recuerda nos años últimos, con ocho estranxeros nes sos files, debuta mañana, a les 20.30 hores, nel campu de Santo Domingo col Alcorcón na que va ser la so segunda campaña siguida en Segunda División. Rubén Baraja afronta esti partíu ensin delanteros específicos, polo que Pablo Pérez apunta a titular na punta d'ataque, con dos delanteros del filial, Pablo Fernández y l'angoleñu con pasaporte suizu Neftali Manzambi, que sumaría el novenu foranu de la plantiya, a la espera d'una oportunidá nel bancu.

Les salides de Carlos Castro, Borja Viguera, Michael Santos y Nano Mesa nun foron cubiertes por Miguel Montes Torrecilla, que namái foi quien a zarrar el fichaxe, el miércoles, del atacante inglés Nick Blackman, que nun viaxa al tener unes molesties musculares. Quedaría por llegar un '9' con facilidá pal gol, pero too paez indicar que'l direutor deportivu roxiblancu va agotar los plazos pese a la falta de recursos colos que cuenta Baraja, con otru partíu oficial pendiente enantes de que se pieslle'l mercáu.

Joselu, refuerzu estrella

L'Uviéu va comenzar la Lliga en casa'l domingu, a les 19 hores, contra un equipu que va enfrentase al conxuntu carbayón per primer vegada. Trátase del Extremadura Unión Deportiva, club fundáu nel 2007 que pretende ser herederu del Club de Fútbol Extremadura, yá desapaecíu, que llevó'l fútbol de Primera a Almendralejo na década de los 90.

Juan Antonio Anquela nun tien les preocupaciones del so colega en Xixón, yá que'l de Linares pudo trabayar con un equipu práuticamente fechu dende'l comienzu de la pretemporada, calteniendo la base principal del añu pasáu. El fichaxe de Joselu, pichichi de la categoría hai dos años col Lugo, proporciona al Uviéu'l complementu d'ataque pa Toché deseáu polos téunicos del club que, al igual que'l Sporting, tien marcáu como oxetivu l'ascensu a Primera.