Una tesis doctoral sobre la evolución histórica d’Ayande ye la primera n’asturianu de la Facultá d’Historia

|
Andrés Menéndez Blanco

L’arqueólogu ayandés Andrés Menéndez Blanco defendió’l xueves la so tesis doctoral, entitulada ‘Estudios diacrónicos del paisaxe y el poblamientu nel noroeste ibéricu: el territoriu d’Ayande (sieglos I-XIII)’. Ye la primer vegada na Facultá d’Historia de la Universidá d’Uviéu que se presenta una tesis n’asturianu dafechu.

Los profesores Margarita Fernández Mier y Francisco Javier Fernández Conde dirixeron el trabayu de Menéndez Blanco, centráu na evolución histórica d’Ayande ente los sieglos I y XIII de la nuesa era, dende la conquista romana hasta la formación de les poles medievales. El tribunal, formáu polos profesores Juan Antonio Quirós (Euskal Herriko Unibertsitatea), Jordi Bolós (Universitat de Lleida), Alejando García-Álvarez (Universidá d’Uviéu), Rebeca Blanco (Universidade de Santiago de Compostela) y Xulio Viejo (Universidá d’Uviéu), otorgó la calificación máxima a la tesis doctoral.

El testu estudia la evolución del poblamientu n’Ayande y los territorios inmediatos a partir de múltiples fontes y téuniques d’investigación. Nella axúntase información proveniente d’esploraciones de subsuelu y escavaciones arqueolóxiques, documentación escrita, toponimia o tradición oral, sobre la que s’apliquen les últimes téuniques pal so análisis.

Partiendo d’estos datos, l’autor fai una revisión de toles evidencies de los sitios fortificaos, el poblamientu históricu o menciones na documentación pa desenvolver una lectura de les tresformaciones del territoriu a lo llargo de más d’un mileniu: l’abandonu de los poblaos castreños, l’aparición del poblamientu abiertu o la formación de los distintos territorios alministrativos hasta la fundación de la villa de La Puela y la creación del conceyu que llegó hasta los nuestros díes. Los resultaos obteníos ayuden a dar lluz sobre dalgunos de los interrogantes actuales de la investigación histórica, permitiendo introducir a Ayande como un exemplo d’estudiu nos intensos debates académicos que se tán desenvolviendo anguaño n’Europa alredor d’estes cuestiones.

Per otru llau, l’autor formula la necesidá de continuar coles investigaciones nesti conceyu pol gran interés de dalgunos de los sitios arqueolóxicos que guarda y pol so potencial como recursos pal desenvolvimientu local.

Normalización del asturianu nel ambiente académicu

Menéndez Blanco quixo amás con esta tesis dar un pasu alantre hacia la normalidá del usu del asturianu nel ámbito académicu, polo que presentó’l testu en llingua asturiana y emplegó l’idioma na so defensa énte’l tribunal. Yera la primer vegada que se facía na Facultá d’Historia.

Contador Estadistiques