Una emocionada Piñán despídese y ve'l futuru "como ciudadana"

Lleó a los diputaos presentes na Comisión de Cultura, Política Llingüística y Turismu'l poema 'Lista' de la polaca Wisława Szymborska.

Berta Piñán dexó entever que nun siguirá como conseyera la llexislatura próxima. Na so comparecencia esta mañana na última comisión del mandatu pa, a pidimientu de Luis Armando Fernández Bartolomé, informar sobre tolo rellacionao col área de Cultura, llamentó nun poder ver finaos, "porque una llexislatura ye curtia y más una na que tuvimos dos años dedicaos a lo que teníamos que dedicanos, que yera tolo derivao de la pandemia", diferentes proyeutos, inversiones y equipamientos yá encarrilaos, como Al Faro, que, apuntó, va esfrutalos "como ciudadana" na llexislatura próxima.

La escritora despidióse de tolos diputaos que participen na comisión agradeciendo "el tonu de respetu, de debate, d'entendimientu, y d'aportar y ayudar a la xestión d'esta conseyería que nun siempre foi fácil, pero que siempre foi entusiasta y convencida". Y como epílogu, magar que la sesión continuaba, lleó los versos de la traducción al castellanu del poema de Szymborska incluyíu nel so llibru 'Instante', emocionándose y consiguiendo emocionar al empar a los presentes –la presidenta de la comisión, Lidia Fernández Fernández, que tuvo que secar les llárimes–, qu'aplaudieron a la conseyera.