“La ciudadanía asturiana ta preparada pa un debate a fondu sobre l’asturianu”, asegura Piñán

La Comisión de Cultura, Política Llingüística y Turismu última de la llexislatura celebróse esti xueves, sesión na que compareció Berta Piñán a pidimientu de Luis Armando Fernández Bartolomé. L’ex diputáu de Ciudadanos, qu’afirmó que “l’asturianu ye un buque insinia de la cultura n’Asturies”, entrugó a la conseyera sobre si echó en falta “un debate más fondu y serenu” sobre la oficialidá del idioma.

En concreto, especificó –emplegando un asturianu amestáu– qu’él sí estrañó, “independientemente del resultáu final, porque se necesitaben 27 votos, un debate fondu, serenu, asosegáu, con datos… Un procedimientu de debate abiertu, con rigor. ¿Vusté cree que falló’l procedimientu? Esto ye, ¿cree que, al marxe del resultáu final, esti Parllamentu podría enfocar, dao qu’amás había unos grupos políticos que sofitaben la iniciativa, otru tipu de debate sobre l’asuntu y que quedó nun nivel superficial? Porque yo creo que l’asturianu ye un buque insinia de la cultura n’Asturies, eso nun lo dulda naide”.

“Nun soi yo quien pa xulgar los debates que nesti Parllamentu se fixeron sobre política llingüística y sobre too sobre la oficialidá del asturianu. Fixéronse debates públicos y debates privaos nes que yo nun taba presente. Dende llueu tolos debates serenos, bienveníos sean; tolos debates qu’afonden nos temes, bienveníos sean; tolos debates que nun crispen, que nun enfrenten de manera completamente gratuita dalgo que ye patrimoniu de tola ciudadanía asturiana, bienveníu sean”, respondió Piñán, que recordó que nesti alderique sobre la política llingüística y normalización del asturianu “llevamos munches décades”.

Apuntó que “cuando pasa a los medios de comunicación nun contestu de posible oficialidá salió lo meyor y lo peor, y obviamente cuando sal lo meyor y lo peor nun tamos falando casi nunca de debates demasiaos serenos”. La escritora aseguró darréu que “la ciudadanía asturiana ta preparada pa un debate a fondu sobre l’asturianu. Tamos preparaos porque llevamos faciéndolo munchos años”.

“Equí cola llingua asturiana”, siguió, “hai una especie d’adanismu, como hai a veces tamién colos derechos de les muyeres…, con determinaos derechos. Paez que siempre tamos inventando, empezando de cero, y nun ye asina”. Poro, considera que “lo primero que teníemos que facer como ciudadanos y como representantes tamién de la ciudadanía ye facenos cargu d’esa historia d’un debate, que ye un debate arriquecedor, que nos aporta yá conclusiones y llevales al presente, que ye onde tenemos que trabayar por ello”.

Proyeutu políticu d’Asturies “a mediu cocer”

Fernández Bartolomé aseguró “tar d’alcuerdu” con Piñán y apuntó que, sobre manera depués de la Transición, “vemos cómo’l reconocimientu dende un puntu de vista históricu, académicu, lliterariu…, a tolos niveles, del asturianu, foi creciendo. El tema de la cooficialidá yera otru tema, digamos xurídicu-políticu d’oportunidá. Almitiendo qu’esi debate nun tien vuelta atrás, sacante cuatro ultramontanos, la cuestión en términos xurídicos y políticos yera si la cooficilidá yera oportuna políticamente nestos momentos. Yo creo que nun se fixo un debate serenu, y siéntolo. Porque nel fondu tamién tien que ver con un proyeutu políticu d’Asturies y un proyeutu políticu d’identidá del territoriu que ta a mediu cocer respeuto a los caminos que fixeron otres comunidaes”.

Na semeya, Piñán y Andrea Suárez Rodríguez, secretaria xeneral téunica de la conseyería, conversen momentos enantes d'entamar la comisión.