Una camisa de muyer de llinu del sieglu XIX procedente d’Anzu, nel V Día’l Traxe’l País

|
Indumentaria 2019 Día'l traxe'l país

L’ameyoramientu de la situación sanitaria permite la recuperación adulces de l’actividá cultural y devuelve a Grau esti domingu la celebración, con toles midíes de seguranza, del Día’l Traxe’l País. El concursu ‘Indumentaria’ ye'l gran atractivu de la cita, na que se va presentar una camisa de muyer de llinu del sieglu XIX atopada n’Anzu.

Con menos participantes que nes cuatro ediciones pasaes por cuestiones d’aforu, la pasarela de moda de vistimienta tradicional asturiana d’esa época instalada frente a la capiella de Los Dolores va recuperar el pasu d’homes y muyeres a les 13 hores con cuidaos exemplos acompañaos pola música en direuto d’Octavio Trapiella y Dolfu Fernandez. “Dientro los cortes y la confección tradicional asturiana, toos van llucir propuestes diferentes y personales, qu’enseñen la manera de vistir de los nuestros antepasaos destacando les característiques propies de dellos llugares, situaciones de la vida y rangu social. Pañu finu y estameña basta, muncho prieto y pardo resaltáu con colores vivos o apagaos, seda y terciopelu, ricos y probes”, esplica la organización, que cuerre a cargu de Berto Suárez.

Nel Día’l Traxe’l País tamién se van poder ver dalgunas de les poques pieces d’indumentaria antigua que se conserven n’Asturies, que salen del arca pa que se conozan y documenten gracies a esti concursu. Esti añu rescampla una camisa de muyer del sieglu XIX atopada n’Anzu por Xosé Antón Fernández ‘Ambás’ y Ramsés Ilesies y confeccionada con llinu que se semó y se texó nel conceyu de Grau.

El xuráu de ‘Indumentaria’ va tar compuestu nesta edición por Consuelo Riu, Amadéu Benavente, Constantino Menéndez y Héctor Díez. Van encargase d’escoyer los trés meyores traxes d’home y de muyer presentaos, que van llevar una recompensa de 200, 150 y 100 euros en cada categoría gracies al patrociniu de Caja Rural de Asturias.

Amás van recibir de manes d’Elsa Suárez, conceyala de Cultura y Festexos, y d’un representante de la entidá bancaria unes lligues, de diseñu a costafecha, que van poder llucir amarrando les medies p’ameritar l’honor de ser que meyor taben vestíos de la edición de 2021. Berto Suárez espresa la so “satisfacción pol nivel tan altu que lleva algamáu el concursu ‘Indumentaria’, que nació pa poner en valor, enseñar y reivindicar la escelencia nel vistir a la hora de llucir los traxes tradicionales asturianos”.

La tarde, pal baille

El baille tampoco nunca falta nel Día’l Traxe’l País. A les 17.30 hores na Plaza’l Mercáu van cantar y tocar la panderetera Leticia Baselgas y el grupu Andecha Folclor d’Uviéu, pa rematar la tarde Ambás y Ilesies. Pareyes de los grupos Xeitu, Trebeyu, Vezos Astures, Andecha Folclor d’Uviéu, Fitoria y San Félix van acompañar baillando nun espaciu acotáu nel llugar.

Semeya obra d'Ojos de Hojalata Fotógrafo na edición última de 'Indumentaria', nel 2019.

Contador Estadistiques