Grau vive'l VI Día'l Traxe'l País, col concursu 'Indumentaria' como actividá central

La villa acueye una edición nueva d'esta gran fiesta al rodiu la identidá asturiana.

Esti domingu va celebrase' en Grau'l VI Día'l Traxe'l País, nel que s'entama'l Concursu y Muestra de Traxes Tradicionales Asturianos. Una xornada pa reivindicar el nuesu paxellu tradicional; pa vistilu, llucilu y vivilu.

L'actividá va arrancar a les 10 hores con música tradicional, pa dar entamu a les 13 hores a la parte pública concursu 'Indumentaria' na plaza Los Dolores. "Nun ye un certame de guapura física, ye un concursu onde se va valorar que les persones se vistan con xeitu y fachenda según les fontes documentales que se conocen, reproduciendo la manera de vistir de los asturianos de mediaos del sieglu XIX", espliquen los organizadores.

La exhibición de los paxellos por parte de los participantes va tar acompañada pola música de Celso Díaz, Nel Díaz, Octavio Trapiella y Dolfu Fernández. El xuráu va repartir premios de 200, 150 y 100 euros pa la categoría d'home y pa la de muyer.

Xuegos tradicionales pa la reciella y baille

Pela mañana tamién van organizase xuegos tradicionales pa la reciella, de 11 a 12.30 hores frente a la Casa Conceyu, de la mano de Prau Llerón baxo'l nome de 'Menudu traxín'. Yá de tarde, l'actividá va treslladase a la Plaza'l Mercáu, con baille dende les 17.30 hores con pandereta, gaita y tambor.

Tán confirmaos pa participar nesta folixa Paz Mesa y Luis. A. Pola; Henar Buznego y Paula Vega; Nacho Díaz y Elena Díaz; Roge Feito y Clarita Braña; Ivan Fernández y Fonsu Fernández; y Ramsés Ilesies y Xosé Antón Fernández 'Ambás'

Semeya obra d'Ojos de Hojalata Fotógrafo.