Un piñu de ciudadanos glayó en Xixón que "Asturies nun tien rei"

Dellos manifestantes quemaron retratos de los reis d'España, de visita n'Asturies.

Al rodiu dos centenares de persones axuntáronse a les 13 hores de güei n'El Náutico pa protestar contra la presencia nel país de Felipe VI y Letizia baxo'l lema 'Asturies nun tien rei'. Con asturines y tricolores, y baxo la vixilancia d'una descomanada presencia policial, los presentes sintieron discursos de los entamadores y glayaron consignes contra la monarquía.

La convocatoria taba sofitada por partíos y coleutivos como Andecha Astur, Anticapitalistes Asturies, Federación Asturiana Memoria y República (FAMYR), Comité d'Asturies pola Amnistía o Bloque Críticu Asturies. Al final de la mesma, los presentes punxéronse en filera pa dir tirando semeyes de la familia real a un fueu mientres glayaben "Asturies nun tien rei", "La monarquía a la hoguera" o "Asturies, mañana, será republicana".

La organización fixo un llamáu nuevu p'acudir mañana a les 13 hores al 'Elogio del Horizonte' pa facer una aición consistente na "llimpieza y desinfeición de la zona" per onde tuvieron güei les autoridaes. El llunes Andecha Astur entamara otra na ponte de Cangues d'Onís pa facer un mosaicu coles pallabres 'República Asturiana'.

Los reis visiten pela tarde'l circuitu d'Alonso

Los reis d'España finen güei n'Asturies la so xira "pa reconocer l'esfuerciu del conxuntu de la sociedá española frente a la pandemia del COVID-19 y sofitar a distintos sectores sociales na recuperación de l'actividá". Pela mañana tuvieron na planta de Coxersa en Serín y llueu en L'Atalaya pa visitar el 'Elogio del Horizonte' y la esposición pol 30 aniversariu de la escultura xixonesa de Chillida.

Esta tarde, xunto coles autoridaes, Felipe VI y Letizia van a acudir a Llanera, al Museo y Circuito Fernando Alonso.

Semeya obra d'Armando Álvarez.