Un panel nuevu d'Electomanía aumenta l'apoyu a la oficialidá al 62 por cientu

N'avientu del 2021 la cifra yera del 60 por cientu. Un 92 por cientu cientu de los votantes del PSOE y un 79 de los de Foro, a favor.

Electomanía asoleyó esta tarde un ElectoPanel sobre l'apoyu a la cooficialidá del asturianu nel que la xente favoratible algama un 61,9 por cientu por un 36,1 por cientu que ta en contra. Un 2 por cientu nun se pronuncia.

Esta cantidá ye dalgo superior a otru panel fechu l'añu pasáu por Electomanía, asoleyáu n'avientu, que dexaba un porcentaxe del 59,6 por cientu pola reconocencia de los derechos llingüísticos de los falantes d'asturianu. Un 39,5 por cientu oponíase.

Aumenten sobre manera les persones favoratibles ente los votantes de Foro, que pasen de ser un 62,5 por cientu a un 79. Medra tamién nos del PSOE, del 86,7 por cientu a un 92,1, y baxa un poco nos de Podemos y Izquierda Xunida (IX), anque sigue siendo una postura mayoritaria'l sí a la oficialidá: un 95,8 y un 95,7 por cientu, de manera respeutiva, pol 96,9 y 97 por cientu del añu pasáu.

Ente los contrarios, VOX rexistra un 91,4 por cientu (96,9), el PP un 89,9 por cientu (88,2) y Ciudadanos, un 64 por cientu (71,8). Rescampla'l 7 por cientu de votantes populares que 'nun saben/nun contesten'.