El 60 por cientu de los asturianos ta a favor de la oficialidá, según un panel d'Electomanía

|
AsturPanel Electomanía oficialidá del asturianu

El 62,5 por cientu de los votantes de Foro na encuesta sofita anguaño la reconocencia de derechos de los falantes d'asturianu.

Electomanía asoleyó esta mañana l'AsturPanel nel qu'entrugaba sobre la oficialidá del asturianu. Un 59,6 por cientu de la ciudadanía taría a favor por un 39,5 que s'amuesa contraria, mentes qu'un 0,9 por cientu que nun se pronuncia.

Por partíos, esiste un gran sofitu nos votantes de los trés d'izquierda con representación: un 97 por cientu nos d'Izquierda Xunida (IX), un 96,9 por cientu nos de Podemos y un 86,7 por cientu nos del PSOE. Los de Foro, con un 62,5 por cientu, tamién apoyen d'una manera mayoritaria esta reconocencia de derechos.

Pela so parte, la oposición céntrase nes trés formaciones d'ámbitu estatal de dereches. Un 96,9 por cientu de los de VOX refúgala, por un 88,2 por cientu del PP y un 71,8 por cientu de Ciudadanos.

Apoyu en Xixón y Avilés

Xixón, con un 61,7 por cientu, ye onde más apoyu hai a la oficialidá de les trés grandes ciudaes del país, mentes que n'Avilés ta nun 59,8 por cientu. N'Uviéu, por contra, ta nel 48,5 por cientu, por un 50,1 en contra.

Esti panel fíxose ente'l 19 y el 26 de payares y consta de 1.224 respuestes, con una desviación de 2,4 puntos.

Contador Estadistiques