Un gol de penalti da'l derbi al Uviéu

Borja Bastón executó de manera esceicional la pena cometida por Izquierdoz sobre Koba a falta de poco más de 15 minutos pal final, únicu remate a puerta de los azules nel partíu.

L'Uviéu tornó a ganar derbi, nesta ocasión nel Carlos Tartiere (1-0), que recibió a 24.574 espectadores. Los d'Álvaro Cervera superaron los primeros 20 minutos d'acosu roxiblancu pa llevar depués el partíu al so terrén y resultar vencedor nuna aición aisllada.

Un escesu d'Izquierdoz nuna xugada ensin aparente peligru llevó al arxentín a pisar el todiyu de Koba, que llevaba unos minutos nel campu. Bastón nun falló nun llanzamientu imparable nel que Cuellar tampoco nun adivinó la intención que xubió al marcador nel minutu 74.

Foi l'únicu tiru a puerta del Uvieú nos 90 minutos y l'añadíu. El Sporting, llastráu otra vegada pola falta d'aciertu, intentólo hasta'l final, pero namái contó con dos aiciones protagonizaes por Cristo, que nun llegó por poco nuna y disparó al llateral de la rede n'otra, quedando la folixa nel Tartiere pa deceición del millar de desplazaos presentes.

La Copa, enantes de Navidá

Con esti resultáu, l'Uviéu iguala na tabla al Sporting con 27 puntos, anque los roxiblancos tán perriba pola diferencia global de goles (-2 y 0, de manera respeutiva). Asina, acaben la primer vuelta a 5 puntos de los puestos d'eliminatories pol ascensu, que marca'l Granada con 32, y con una ventaya de 6 sobre'l descensu, al tar el Lugo decimonovenu con 21.

Enantes del parón navidiegu, los dos equipos asturianos van xugar la segunda ronda de Copa. L'Uviéu recibe al Granada'l xueves a les 21 hores, mentes que'l Sporting va tener que viaxar a Soria pa enfrentase al Numancia, equipu de Primera RFEF, el miércoles a les 19 hores, partíos que van ser nesta ocasión televisaos por Movistar.