Un derbi na zona media de la tabla clasificatoria

|
Uviéu Sporting

Uviéu y Sporting enfréntense nel últimu partíu de la primer vuelta cola intención d'acabar l'añu mirando p'arriba.

El Carlos Tartiere Nuevu acueye esta nueche, a les 21 hores, el primer de los derbis d'esta temporada. Un partíu siempre esperáu poles aficiones de los dos equipos, qu'esta temporada nun tienen muncho que celebrar.

Tanto Sporting como l'Uviéu naveguen na metá de la tabla, en tierra de naide. Los roxiblancos, con un bon entamu de Lliga, vienen ocupando siempre la parte media alta de la tabla, pero una mala racha ensin algamar victories dexólu na undécima posición con 27 puntos, a 5 de los puestos pa lluchar pol ascensu que marca'l Granada.

Mentes, los azules lleven una dinámica opuesta, con un mal arranque que-y costó'l puestu a Jon Pérez Bolo y la llegada posterior de bonos resultaos con Álvaro Cervera. Empicipia la xornada l'Uviéu nel puestu 16, a 3 del Sporting y 7 del descensu.

Dulda na portería xixonesa y baxa de Costas

El central David Costas finalmente nun va poder tar esta nueche nel derbi al nun recuperar de les sos molesties nel llombu. Tamién son baxes Marcelo Flores y Miguelón, que se sumen a Montoro, Sangalli y Javi Mier.

Nel Sporting la dulda ta na portería, una vegada que Pichu ta disponible. Mentes, les ausencies coles que cuenta Abelardo son Nacho Méndez y Bamba, con lesiones de llarga duración, y Campuzano.

Depués del derbi, a los dos equipos asturianos-yos quedará la Copa pa finar l'añu. Na segunda eliminatoria l'Uviéu va recibir al Granada (xueves, 21 hores) y el Sporting viaxa a Soria pa enfrentase al Numancia (miércoles 19 hores), agora en Primera RFEF.

Contador Estadistiques