La marxinación del asturianu n’Infantil ye llegal, según el TSXA

La xusticia da-y la razón al Gobiernu na marxinación el asturianu n’Infantil. El Tribunal Superior de Xusticia d’Asturies (TSXA) refugó’l recursu del Sindicatu Unitariu Autonómu de Trabayadores de la Enseñanza d’Asturies (SUATEA) que pidía la nulidá del currículu nesta etapa educativa al nun recoyer conteníu nengún de Llingua Asturiana y Gallego-asturiano incumpliendo asina la Llei d’Usu del 1998.

En concreto, SUATEA argumentaba la presentación de dichu recursu contencioso-alministrativu “por nun recoyer nenguna referencia o mención que permita considerar la llingua asturiana como parte integrante del currículo nesta etapa, nin nes sos disposiciones nin nel so preámbulu”. “Esti fechu nun lu niega en nengún momentu de la sentencia, colo que se reconoz lo que ye evidente: la inexistencia nel currículu d'Educación Infantil d'Asturies de nenguna mención nin conteníu dalu de les nuestres llingües”, espliquen depués de conocer la decisión del tribunal.

La Llei d’Usu y Promoción del Bable/Asturianu afita nel so artículu 10 que “nel exerciciu de les sos competencies, el Principáu d’Asturias garantizará la enseñanza del bable/asturianu en tolos niveles y graos, respetando sicasí la voluntariedá del so aprendizaxe". “Ye importante solliniar qu'esti artículu forma parte del ‘Capítulu III. Enseñanza’ y dientro d’elli esti artículu llámase ‘10.Currículu’”, apunta’l sindicatu, qu’entiende que “regula la Enseñanza y, dientro d'ella, específicamente'l currículu, ordenando que tien de recoyer la llingua asturiana en tolos niveles y graos”, apunta SUATEA sobre la norma.

“Emplegando la terminoloxía d'anguaño, que nun se correspuende cola emplegada nel 98 pola Llei d'Usu, la Educación Infantil (EI) ye una etapa educativa que tien dos ciclos y cada ciclu 3 niveles. Anque la terminoloxía nun ye la mesma, cualisquier mortal entiende que l'espíritu de la llei, cuando se refier a tolos niveles y graos, inclúi a toles etapes educatives al tar éstes formaes por distintos niveles. La EI ye una etapa educativa, forma parte del Sistema Educativu xeneral y, polo tanto, el so currículu vese comprometíu polo dispuesto nesti artículu 10”, aseguren.

El TSXA sentencia, por contra, que “ye escluyida precisamente n’atención a la especial configuración de dicha etapa educativa, n’árees integraes, y non en materies específiques, y ensin posibilidá d’establecimiento de nueves árees o materies optatives por parte de l’Alministración autonómica”. “Esto ye, el tribunal preconcibe que la única manera que tien la llingua asturiana d'integrase nel currículu d'EI ye como una materia horaria fuera de les reglamentariamente establecíes”, espresa SUATEA, qu’esplica darréu que “los conteníos de les nuestres llingües, igual que tán integraos cualisquiera otros correspondientes a distintes categoríes de conocimientu, como son l'Inglés, les matemátiques, la música o'l dibuxu, podríen y deberíen integrase nel área de ‘Comunicación y representación de la realidá’ ensin formar una área o materia optativa aparte”.

Amás, rescampla que “nin la Llei d'Usu nin el nuestru Estatutu d'Autonomía pauten la optatividá de les enseñances de les nuestres llingües, sinón la so voluntariedá como única condición
pa recibiles”.

El TSXA diz qu’Infantil nun forma parte de la enseñanza básica

Amás, la xusticia considera que “la enseñanza infantil nun forma parte de la básica y que poles sos
carauterístiques, ente elles la edá de los alumnos, propónse l’aprendizaxe de propuestes globalizaes y non materies específiques”. “Vuelve a repitise l'argumentu anterior, que ye la esencia del fallu en contra de la nuestra demanda y amiéstase como complementariu que la EI nun forma parte de la enseñanza básica”, apunta SUATEA al respeuto, qu’entiende “que se confunde equí la terminoloxía empegando'l términu básica pa referise a que la EI ye voluntaria, non obligatoria, pero ye indiscutible que la EI forma parte de la educación básica, puesto que ye la primera etapa de la formación reglada y fundamental pa construir postreros aprendizaxes, como bien saben el 96,6 por cientu de los padres y madres que nel Estáu español escolaricen a les sos fíes y fíos nesta etapa fundamental”.

El sindicatu apunta amás que “la Llei d'Usu nun fai nenguna clasificación de la enseñanza en básica, obligatoria o voluntaria, sinón niveles y graos y en toos ellos tiende garantizase la enseñanza del bable/asturiano. Poro, tando la EI formada por niveles o graos, tien d'enseñase. Lo que nun diz ye cómo”. Asina, “presuponer como fai la Conseyería y el Tribunal que tien d'impartise como una materia aparte, inintegrable nes aries curriculares establecíes, constitúi un apriorismu tramposu que val pa safase de lo mandao por una llei asturiana, pues les enseñances de les nuestes llingües son perfectamente integrables na EI cumpliendo tolos principios pedagóxicos establecíos, como lleva demostrando cuantayá el profesoráu que los lleva impartiendo nes escueles asturianes”.

Pa finar, asegura que “tolo espuesto enantes demuestra la falta d'interés del Gobiernu d'Asturies nel avance de la normalización llingüística, tamién nes aules, faciendo rescamplar la hipocresía del PSOE cuando diz tar pola oficialidá de los nuestros idiomes y el Gobiernu d'Asturies, al través de la Conseyería d'Educación, nin siquier inclúi na etapa d'EI la enseñanza de les nuestres llingües, conociendo como conoz qu'esta etapa ye esencial nel aprendizaxe de los idiomes y, polo tanto, nel caltenimientu de los propios d'Asturies”.