Un coleutivu quier recuperar a La Vieya pal Antroxu d’Avilés

Antroxu Tradicional d’Abillés trabaya nuna propuesta pal Conceyu, asociaciones y vecinos pa recuperar el personaxe de La Vieya. “Tien que volver a ser la qu’abra y pieslle l’Antroxu avilesín”, asegura esti coleutivu, que lleva un añu d’investigación y trabayu “pa intentar recuperar el nuesu pasáu históricu y cultural más antiguu”.

“Ensin dubia, el personaxe d’Antroxu más conocíu na ciudá ye La Vieya, ‘La Vieya l’Hibiernu’. La xente, sigue recordándolu con ciñu y, afortunadamente, paez entamar a percibise un importante alcuerdu ciudadanu pa que La Vieya torne a ser la exa vertebradora de tol Antroxu avilesín”, apunta al tiempu qu’aseguren tener dos premises fundamentales nesta recuperación: rigurosidá colos estudios etnográficos y respetu a la hora d’adaptalu al contestu social y cultural actual.

La folixa entamábase plantando o llantando la vieya, aición que la propuesta d’Antroxu Tradicional d’Abillés –qu’emplega nel so nome “el guapu topónimu medieval de la nuesa ciudá– asitia n’El Parche. “La forma de representación d’esta escultura entovía nun ta zarrada, pero pensamos podía asemeyase estéticamente a ‘Les Vieyes’ que se plantaron pelos años 80. Esta figura o representación del personaxe, nun se quemaría, indultaríase pudiendo reutilizase todos los años si cree oportuno”, espliquen dende esti coleutivu.

Y ye que l’actu final del Antroxu ye ‘La quema La Vieya’, como se conoz tradicionalmente, o ‘La foguera La Vieya’, “un ritu que celebra’l renacer de la madre tierra, el tiempu nuevu de lluz y vida, dexando atrás el tiempu d’escuridá y el fríu”. La quema taría presidida por un mazcaritu vistíu de Vieya que daría fueu a la foguera con una antorcha pa facer amburar un espantayu representantivu fechu materiales d’orixe natural.

Cortexu de mazcaritos y carros revistíos

Xunto con La Vieya tamién propónse recuperar el cortexu de mazcaritos, “un desfile onde’l protagonismu llevaríenlu los carros revistíos con diferentes adornos naturales: rames de lloréu, flores, fueyes de maíz, panoyes, llanes, tires de tela y cualquier otru elementu que contribuya a esti fin (sacos, forques, paxes, herba seco, mimosales, escobos, etc.)”. Enriba de caún diría una comparsa qu’interactuaría cola xente presente na cai, saltando, baillando y cantando, col acompañamientu posible d’un gaiteru y un tamboriteru.

“Gracias al trabayu etnográficu de documentación y, sobre manera, a les entrevistes feches a diferentes informantes, ente los que rescamplen Pepe Venancia, ta intentándose recrear dalgún de los mazcaritos de lo último del sieglu XIX y entamos del XX, con personaxes mu significativos como Los Caperuchos, Los Vexigueros, L’Escobón, Los Sábonos o Sabanones, El Gochu, El Caballu o Burrueñu, Los Xamascos, El Cornelo, Los Diaños de les Mullíes, Los Panoyones, L’Atabal, El Vieyu, El Baillarín, etc.”, rellata Antroxu Tradicional d’Abillés. Estos personaxes lideraríen el desfile.

Antroxu Tradicional d’Abillés llama al texíu asociativu del conceyu, grupos sociales y culturales a participar y contribuir na restauración d’estos elemenos del Antroxu tradicional avilesín. “El nuesu oxetivu ye salvar el personaxe y volver a recuperar el consensu social”, asegura.

Na semeya, Víctor Raúl Pintado 'Vitu' y César Álvarez Lao, d'Antroxu Tradicional d'Abillés, amuesen dibuxos de La Vieya fechos por Berto Álvarez Peña.