El mazcaritu El Cornelu torna ocho décades depués al Antroxu d’Avilés

Depués de La Vieya, el Coleutivu Abillés Antroxu Tradicional quier recuperar a El Cornelu o Diablu pal Antroxu d’Avilés más de 80 años depués. Ye un mazcaritu tradicional del qu’hai referencies orales, del que rescamplen los sos cuernos, que cuenta con traxe nuevu obra de Raquel Vega col asesoramiento d'Alberto Álvarez Peña.

Los trabayos fechos nestos años por esta organización revisando fontes hemerográficas y, principalmente, faciendo entrevistes a distintos informantes, tán permitiendo recrear como seríen dalgunos de los mazcaritos que ‘corrieron l’Antroxu’ na rexón d’Avilés nel primer terciu del sieglu XX. L’añu pasáu punxo’l so enfotu en La Vieya, exa vertebradora de tol Antroxu avilesín tradicional, y nésti fíxolo n’El Cornelu, de Miranda, que se va presentar a les 17.30 hores na residencia de mayores Larrañaga d'El Quirinal.

Ensin referencies escrites, les únicos fontes foron orales, siendo clave les referencies daes por José Rodríguez Valdés, de 93 años, conocíu como Pepe Venancia’l de Miranda. Describíalu como “un mozu amazcaráu que lleva unos cuernos con unos cordeles amarraos a una melena fecha con pieles d’oveya que-y llegaben hasta la cintura. Tenía una careta de tela con una barba mui llarga fecha colos pelos de la cola d’un burreñu o caballu”.

Gracies a estos detalles y, col asesoramientu d’Álvarez Peña, la especialista n’indumentaria tradicional Vega, de Vezos y Costumes, fixo una recreación del traxe. “Cuando la vi encantóme, ye una pasada y dende’l mio puntu de vista tien un gran potencial”, apuntó Sara Vega, miembru de los Reyes del Goxu y la Faba que tamién participen xunto col Coleutivu Abillés Antroxu Tradicional na recuperación d’estos personaxes.

Pela so parte, Venancia quedó contentu col resultáu, anque apuntó que lu recuerda más suciu y foliáu, lo qu’ayudaba a que diera más mieu. El Cornelu, nome que vien del bron y que significa güe, probablemente saliera per vegada última nel 1935 o 1936, y depués de la Guerra Civil desapaeció como otres munches manifestaciones d’esti calter en tol país, dalgunes recuperándose tiempu atrás y otres quedando na memoria de los más mayores.

Agora, 86 años depués, torna cola intención de quedar. Posible pariente de Los Zamarrones de La Pola, Los Sidros de Valdesoto, El Diablu de San Xuan de Villapañada, Los Zarramacos de Silió (Cantabria), Los Carochos de Riofrío (Zamora) o’l Momotxorro d’Altsasu (Navarra), Cesar Álvarez y Víctor Raúl Pintado Rey ‘Vitu’, del Coleutivu Abillés Antroxu Tradicional, prefieren referise a él como un mazcaritu tradicional, esto ye una persona amazcarada del Antroxu avilesín del entamu del sieglu XX más que como un personaxe d’una mazcarada d’iviernu que sal a pidir l’aguilandu, hasta nun contar con referencies escrites.

Na semeya superior, Vega, Vitu y Álvarez Peña cola parte d'arriba del traxe d'El Cornelu. Na inferior, l'informante Pepe Venancia posa cola pieza.