Trece formaciones preséntense'l 10-P pal Congresu, una más que na convocatoria anterior

Más País-EQUO y el PCPE súmense a la convocatoria d’eleiciones estatales del 10 de payares, de la que cai Actúa. Un total de 13 candidatures preséntese pal Congresu por Asturies, mesma cifra que pal Senáu, calteniendo los cinco partíos con representación los mesmos cabezaleros que na cita del 28 d’abril.

Asina, Adriana Lastra (PSOE), Paloma Gázquez (PP-Foro), Sofía Castañón (Xuníes Podemos), José Ignacio Prendes (Ciudadanos-Partido de la Ciudadanía) y José María Figaredo (VOX) repiten nel númberu ún de la llista pa esta xornada na que se van decidir los 7 escaños que pertenecen anguaño a Asturies nel Congresu. El repartu actual daba 3 a los socialistes y 1 al restu de fuercies.

La gran novedá d’estes eleiciones ya la entrada n’Asturies de Más Madrid, proyeutu lideráu por Iñigo Errejón, como Más País. Pa ello xúnense a EQUO, presentando como candidatu a Segundo González García, diputáu de Podemos por Asturies na llexislatura pasada.

L’otru partíu que se suma a la convocatoria del 10-P ye un vieyu conocíu, el Partido Comunista de los Pueblos de España (PCPE), que’l 28-A nun se presentara tres la escisión vivida na organización de la que salió’l Partido Comunista de los Trabajadores de España (PCTE). María González Suárez y Raúl Martínez Turrero encabecen les sos llistes, de manera respeutiva.

Andecha Astur torna a ser l’únicu partíu asturianu que se presenta en solitariu, yá que Foro repite la fórmula de coalición col PP, ocupando otra vuelta’l númberu 2 Isidro Manuel Martínez Oblanca. La candidatura nacionalista sí presenta modificaciones, al liderar la mesma Arturu Xosé Bermeyu, con Llucía Fernández Marqués, cabezalera n’abril, nel puestu 2.

El restu de formaciones que se presenten el 10-P son PACMA, con Walter Sánchez Suárez como candidatu; Por un Mundo Más Justo (PUM+J), con Agustín Garrido; Partido Humanista, con José Antonio López Gómez; y Recortes Cero-Grupo Verde, con María Mercedes de la Torre.

Mercedes Fernández, pal Senáu

No que respeuta a les llistes pal Senáu, destaca la novedá de Mercedes Fernández, que va liderar la de PP-Foro en detrimentu de José Ramón García Cañal, que baxa al númberu 2, tres pautar con Pablo Casado abandonar la presidencia del partíu n’Asturies. El númberu 3 torna a ser pa Foro, repitiendo María del Camino Gutiérrez Gutiérrez.

El PSOE nun camuda, con Francisco Antonio Blanco, María Fernández Álvarez y Fernando Lastra como candidatos. A diferencia del 28-A, cuando Actúa nun se presentó al Senáu, nesta ocasión toles formaciones acuden tamién a les urnes, que reparte los cuatro escaños que-y correspuenden al país na Cámara Alta: Xuníes Podemos, con María Mar García González; Ciudadanos, con Nicanor García Fernández; Andecha Astur, con Ana Fernández Marqués; PACMA, con Cristina Eugenia Abella; PCTE, con Saúl Fernández Garrote; PUM+J, con Noemí Roca; VOX, con Ana Rebeca Díaz Menéndez; Partido Humanista, con Jesús Fernando Rodríguez Roiz; Recortes Cero-Grupo Verde, con José Antonio Lobato; PCPE, con Javier Ortega Serra; y Más País-EQUO, con Eva del Fresno.

Semeya obra d'Emilio baxo llicencia CC BY-SA 2.0.