Asturies escueye per segunda vegada los sos representantes al Congresu y el Senáu

Esti domingu, 10 de payares, les asturianes y los asturianos tán llamaos a les urnes tres la incapacidá de les fuercies polítiques pa llegar a un alcuerdu pa formar gobiernu. Na repetición eleutoral Asturies escueye a los sos 7 representantes al Congresu y 4 al Senáu ente les 13 candidatures, una más que nel mes d'abril

A les 9 hores abrirán les meses eleutorales, que van permanecer abiertes hasta les 20 hores. Pa votar ye necesario acudir col DNI, pasaporte o carné de conducir.

Adriana Lastra (PSOE), Paloma Gázquez (PP-Foro), Sofía Castañón (Xuníes Podemos), José Ignacio Prendes (Ciudadanos-Partido de la Ciudadanía) y José María Figaredo (VOX) van buscar caltener el so escañu. El 28-A el ganador foi'l PSOE, con 3 representantes, por 1 del restu de fuercies.

Andecha Astur, únicu partíu asturianu que se presenta en solitariu, acude a les Estatales con Arturu Xosé Bermeyu como cabeza de llista. La gran novedá d'esta convocatoria ye la presencia de Más País-EQUO, con Segundo González García al frente.

El restu de partíos qu'acuden a esta convocatoria son PACMA, con Walter Sánchez Suárez como candidatu; Por un Mundo Más Justo (PUM+J), con Agustín Garrido; Partido Humanista, con José Antonio López Gómez; Recortes Cero-Grupo Verde, con María Mercedes de la Torre; Partido Comunista de los Trabajadores de España (PCTE), con Raúl Martínez Turrero; y Partido Comunista de los Pueblos de España (PCPE), con María González Suárez.

Nel casu del Senáu, Asturies escueye a los sos 4 representantes por eleiciones. El 28-A el PSOE sumó 3 y PP-Foro, 1.

Siguimientu n'Asturies.com

Asturies.com va facer un siguimientu especial a la xornada al traviés de les nueses redes sociales. Tres el recuentu, los nuesos llectores van atopar na web tola información sobre los resultaos.